لراوبر ویب پاڼه لراوبر يو افغان – تازه خبرونه
په خواشينۍ سره مو خبر تر لاسه کړ چې په جلال اباد کې دنړۍ اونيزې خبريال ديو شمير وسله والو ساتونکو له لورې وهل شوې او ګواښنه ورته شويده، دتر لاسه شويو کره معلوماتو له مخې انورالحق يرغل چې دجلال اباد نه خپريدونکې نړۍ اونيزې سره دنده لري ديکشنبې په ورځ په جلال اباد کې دحامد کرزي په پلوۍ جوړه شوې غونډه کې هغه مهال دوسله والو ساتونکو له لورې ونيول شو او په ګواښونو سره دغونډې له ځايه وويستل شو چې دنړۍ خپلواکه اونيزه يې دغونډې پر يو شمير ګدونوالو ويشله ،
دختيزې سيمې دليکوالو او ژورناليستانو خپلواکه ټولنه دغه ناوړه عمل په کله غندي او دا دبيان ازادۍ او دغه راز دافغانستان داساسي قانون او مطبوعاتو دقانون پرخلاف عمل بولي او دافغان دولت او دهغه نړيوالو ادارو نه چې دبيان ازادۍ د دودونې لپاره کار کوي په ټينګه غوښتنه کوي چې دا موضوع په جدي ډول وڅيړي او عاملينو ته يې دقانون سره سمه جزا ورکړي .
د نړۍ اونيزې د خبريال د وهلو په اړه د ننګرهار ادبي بهير (ناب) پيغام
په خورا خواشينۍ خبر شوو چې له ننګرهاره د خپريدونکې او د ننګرهار د وياړ ( نړۍ خپلواکې اونيزې ) يو خبريال (انورالحق يرغل) د پوهې او فرهنګ په دغه سپېڅلې غېږ کې د يو شمېر ناپوهو او نا فرهنګو جنايتکارو او ټوپکوالو لخوا له دې امله تر زور، زياتي لاندې راغلى چې ولې يې د يوه ولسمشريز نوماند په ملاتړ غونډه کې خپله اونيزه پر خلکو وېشلې؟
ننګرهار ادبي بهير د خپل دغه بهير وال رټنه او توهينول په کلکه غندي، دغه چاره د نا انسانو خلکو کار ګڼي او له قلموالو او ليکوالو هيله لري چې د ( نن پر ما سبا پر تا) ټکي ته په پام سره دې په مېړانه او زړه ورتوب د دغې چارې پوښتنه وکړي.
ژوندي دې وي رېښتيني او پر هېواد مېن فرهنګيان
درنښت
ننګرهار ادبي بهير (ناب) مشرتابه جرګه ګۍ
د نړۍ اونيزې پر وړاندې د زورزياتي په اړه د چينې مجلې پيغام!
په ډېرې خواشينۍ خبر شووچې،د ولسواکۍ،عدالت او بيان خپلواکۍ د شعار ورکوونکي دولت په واکمنۍ کې د نړۍ خپلواکې اونيزې يو خبريال انورالحق يرغل په ننګرهار کې د حامد کرزي په پلوۍ يوه ټاکنيزه غونډه کې د زورواکو تر زور،زياتي او وهلو،ټکولو لاندې راغى.
له ننګرهاره پښتو ژباړې ته لومړۍ ځانګړې خپرونه(چينه)دې سره خوا کې چې دغه ناروا او غيري انساني عمل په کلکه غندي،پر ټولو قلموالو غږ کوي چې د داسې چارو د بيا نه تکرار او د دغې چارې لاملينو ته د سزا ورکول کېدو په موخه دې سره لاسونه يو کړي.
د خپلسريو د دوام د پاى ته رسېدو او د قانون د پلي کېدا په هيله!
د چينې مجلې اداره
د نړۍ اونيزي سرليکنه :
درنو لوستونکيو! زموږ د خبريال د وهلو، ټکولو له کيسې به تاسې ښه خبر ياست، په دې درسره نه غږيږو، غواړو له دې ماتمه پل اخېستى تاثر درسره شريک کړو او پر خپلې تګلارې د بيا تګ پر هوډ ډاډ درکړو.
يوه ژړا:
د نړۍ اونيزې اداره لومړۍ پر دې ماتم چې دا يې د زورواکو، ټوپکواکو او قانون ضدو پرضد د پيل کړې مبارزې په درشل کې پر وړاندې د سوک، څپېړې لومړى غبرګون دى، د زړه له تله خواشينې ده، غندنه يې کوي، خو؛ د لاملينو د نيولو غږ يې پر دولت ځکه نه کوي چې په دې غږ ورته ځان سپک ښکاري. ځکه په يو دولت کې چې د زرګونه بې ګناه افغانانو وژونکي، سپکوونکي او د ملي ګټو ضد خلکو ته څوکۍ ورکړل شوي يا ورکول کېږي، د يوه خبريال د توهينونکو د سزا غوښتنه ترې بېخي د کېدو وړ نه راته ښکاري.
يوه خندا:
د دې ژړا تر څنګ موږ له دې ماتمه خپله يوه ښه لاسته راوړنه دا ګڼو چې د خپلو پرلپسې ملي ، بې لورې او خپلواکې مبارزې په درشل کې مو خپل مخالف لورى (افغان ولس او اصولو ته ارزښت نه ورکونکى دولت او پلويان يې) چې د قانون، عدالت، ديموکراسۍ، ازادۍ…. چېغو يې دنيا نيولې، دې ته اړ کړى چې د مبارزې په ترڅ کې مو د خپلې ماتې په حس کولو له فزيکي برخورده راسره کار واخلي او د ادارې تر ټولو کوچنى کارکوونکى مو د سلګونه کسانو په مخکې په رڼا ورځ پخپلو شخصي وسله والو او پوليسو وډبوي او خلکو ته د خپلې قانون ماتونې د دوام يوه بله بېلګه وړاندې کړي.
يوه ژمنه:
موږ (د نړۍ کارکوونکي)که څه هم د ژمنو پر ځاى پر کار باور لرو او خپل دا شعار مو په عملي توګه په ډاګه کړى خو بيا هم خپلو درنو هېوادوالو او د خپل ارمان مينه والو، د دوى د ګټو، ارزښتونو او هيلو مخالفو چارواکو او زورواکو سره ژمنه کوو چې ځان ته د پېښو ګواښونو په هېرولو سره، په ټينګ عزم او زړه ورتيا د خپلې ټاکلې لارې او مبارزې دوام او د حقايقو ملتيا خپله ژوند موخه ګڼو. او ديادې شوې ناوړه چارې د عاملينو په ګډون به د خپلو زرګونو هېوادوالو د وژونکو او د خپلو ملي ارزښتونو او ګټو د دښمنانو څېرې ؛ که ژوند و،يوه،يوه به په ډاګه او تر خپلې وسې د خپل عمل په سزا ورسوو.
د يوه سوکاله، عدالت واکمني او ولسواک افغانستان په هيله!
درنښت
د نړۍ اونيزي اداره