طالبانو ته دیوه ماشوم خبره او د لوړ پوړي طالب چاراوکي غبرګون

طالبانو ته  دیوه ماشوم خبره 

دطالبانو دنظام دړنګېدو وروسته داسي هیلي وټوکېدلې چي په ترڅ کي به یې هر وګړي داهیله درلوده چي په څو کلونو کي به د دې جوګه وي چي  خپل تحصیل وکړي ، او دهمدې تحصیل لامله خپل ژوندانه ته ځلاندي شېبې ولټوي .

خو هرڅه بل ډول سول ، نه ښوونځی پاته سو، او نه هم هغه علاقه مندي چي انسان دي ودې ته تشویق کړي ترڅو خپل تحصیل په یوه سیمه کي که هغه ښوونځی وي ، او یا هم کوم بل دمعارف څانګه …
په دې اوه کلونو کي دپښتنو په اړوندسیمو کي ډېر ښوونځي ، ښوونکي او ښوونیز نظام له منځه وړل سوی او لا هم اخته دي چي داډېوې مړې کړي او خپل د ظلم ، دهشت ، او تاریکۍ نظام خپور کړي .
دیوې بحرنۍ ټلویزني شبکې خبریالي تېر کال د وردګو په ولایت کي دطالبانو دسیمه ایز مشر  (ابو طاحه ) او دهغه دجنګیالو سره اوږدې مرکې کړي وې ، چي په ترڅ کي یې ددوی ترتسلط لاندي سیمو کي هغه ښوونځي هم دکمرې پر مخ راوستي ، چي ښوونکي خپل زده کوونکو ته په درسونو بوخت وي ، دادطالبانو دنظام دوخت دنصاب سره هم ډېر توپیر درلود، داځکه چي په دې ښوونځیو کي انګریزي او نور ساینسي مضامین تدریسېدل .

نوموړي طالب مشر په ډېر ټینګار سره ویل ، چي موږ هیڅکله ښوونځي نه سوځوو، او نه هم دا زموږ سره ښايي .

خو هرکله چي کوم ښوونځی د اور ګوله سوی، ډېر ژر افغان دولت  ( دآمریکايانو په لاس جوړ دولت ) پړه یې دهیواد په دښمنانو اچولې، چي مقصد یې ترډېره طالب جنګیالي وي .
دوې ورځي وړاندي یو بل ښوونځی دلوی کندهار په مرکز کي داور ګوله سو، او ټول کتابونه او درسي مواد یې ایرې سوې .

دیادسوي ولایت معارف رئیس په ډاډه توګه وویل چي په دې کار کي د بحرنیو هیوادونه لاس دئ ، چي و ټولو ته څرګند دي ، او نوموړی دطالبانو لاس لرل په داسو پېښو کي ردوي .
عجبه خبره ده ، مرکزي دولت (کابل ) وايي دادطالبانو کار دئ ،  او دهغوی یو استازی بیا وايي، چي دادبحرنیوکړیو کار دئ .

خو په اصل کي خبره بیرته هم پورتنۍ کرښو ته رسي ، چي دطالبانو په کرښو کي داسي اشخاص به خورا لږ وي ، چي داغلط فکر په مغزو کي ولري ، او ددې وطن د بچیانو راتلونکي سره دومره لویه لوبه وکړي  او دتاریکۍ و کندي ته دي واچوي .
ددې کار ترشا پاکستان او ددې سره سم ددې وطن ډېر پخوانی دښمن ایران په دې کوشش کي دي ، چي ددې سیمي پښتانه له هر لحاظ نه ونړۍ ته ذلیل مالوم کړي ، دجنوبي سیمو پښتانه نه یوازي چي نړیوالو او ګاوندیو پري ظلمونه وکړل، بلکي دهمدې سیمي کي لوی سوي مشرانو لا دوګه ورسره کړې ، چي لویه بېلګه یې دتېري اونۍ وهل ټکول وه .

بلي نړۍ کي پوهي او دپوهي خاوندانو ته سرټیټیږي ،خپل ځان ته ځانګړی احترام ورته کوي ، خو په جنوبي افغانستان کي په ځانګړې توګه لوی کندهار کي بیا هرڅه بل ډول وي …

زه په خپله د هغه طالبانو څخه هیله لرم، چي نور ددې وطن ودښمنانو ته ددې زمینه نه برابروي ، چي یو مو وژني ، بل مو سرراپرې کوي ، او بل موږ ګوانتانامو او بګر ام اډو ته ستنوي .
اوس ددې سیمو دبچیانو برخلیک دهمدې ستاسو په لاسونو کي دئ ، تاسو یاست چي ددې ناوړه کار مخه نیولی سئ

که دالیکنه هر یو ښاغلی مجاهد او یوسف احمدي لولي ، هیله کوم چي ځواب یې راکړي . 
 

یارمل – یوسفزی

محترم یوسفزی یارمل صاحب

السلام علیکم ورحمت الله وبر کاته

ورورجانه ددی په خاطرچی موضوع ښه درته روښانه شی نودادی زه دخپل درانه مشرمحترم ملا برادر اخندهغه مرکه چی په یوه برخه کې یې ستا پورته پوښتنی ته هم ځواب ویلې ستا په وړاندی ږدم هیله ده چی په لوستوبه یې ډاډه شی .

والسلام

وروردی قاری محمد یوسف احمدی
داسلامی امارت ویاند