چمن او كندهار د فټبال لوبي سره كوي

تېره ورځ د بلوچستان ايالت د چمن ښار د كوږك فټبال ټيم د كندهار له فټبال ټيم سره لوبه وكړه، چي يو د صفر په مقابل كي د كندهار لوبډلي وګټله.
د كندهار د فټبال فدراسيون رئيس محمدنبي نيازي لر او بر ويبپاڼي ته وويل چي د كوږك فټبال ټيم د دوو لوبو دپاره كندهار ته راغلئ، چي دوهمه به يې نن ماپښين د كندهار په احمدشاهي سټډيوم كي د پامير له لوبډلي سره وسي.
په كندهار كي له يوې مياشتي راهيسي د فټبال خپل منځي سيالۍ پيل سوي دي، چي وروستۍ لوبه يې تېره اونۍ د احمدشاه بابا او كندهار لوبډلو ترمنځ ترسره سوه، چي دوه د يو په مقابل كي احمدشاه بابا ليسې لوبډلي وګټله او د دې سياليو د قهرمانۍ كپ يې وګاټه.
د كندهار د فټبال فدراسيون رئيس محمدنبي نيازى وايي په نيژدې ورځو كي به په دغه ولايت كي يو بل ټورنمنټ هم پيل كړي.