اشعار

سترګي پښتني دي در کتای نسم
ګراني ستا محل ته نور درتلای نسم

دهر او زمان اوس هم ظلمونه کړي
نوم دي د چا مخ ته اخیستای نسم

نور به د زړه راز په شیر کښي نه وایو
ستا دا ښکلی شیر به بیا لوستای نسم

کله به د دې وطن نه کډی کړو
ځه چې ځو نور دلته اوسیدای نسم

داود شا – کندهار

څلوریځه

اغیارو ټپی کړی یمه خپل ځان را ځنی ورک دی
د غیرت په سردرو کی عجب خان را ځنی ورک دی

سرحد د لر او بر یی د نفاق په اور کی وسول
پښتون یمه ساده پښتونستان را ځنی ورک دی

محب الله محب – مزارشریف

څلوريزه

داسمان تندره ورېږه ما سردرته نيولی دی
زه يمه پښتون زلمی ما ټټر درته نيولی دی
د وطن د ننګ لپاره سر په تيګه جنګومه
زه اور سره جنګېږم ما سنګردرته نيولی دی

ډاکټر بيديا