لراوبر ویب پاڼه لراوبر يو افغان – تازه خبرونه
په كندهار كي د شاولي كوټ د پېښي په اړه د احتجاجي غونډي پرېكړه ليك
دوشنبه 20-مه د عقرب
په كندهار كي د شاولي كوټ ولسوالي د عامه وژني په باب احتجاجي غونډه جوړه سوه، پر ولسي وګړو يې د ناټو او ايتلافي ځواكونو ړندې بمبارۍ وغندلې او نړيوالي محكمې ته يې د دې پېښي د عاملينو د راكشولو غوښتنه وكړه.
غونډه چي د نومبر د مياشتي پر لسمه د (هنداري مطبوعاتي بنسټ) د غونډو په تالار كي د كندهار د فرهنګي او مدني ټولنو له خوا رابلل سوې وه، د قران مجيد تر تلاوت وروسته د علامه رشاد اكاډمۍ مشر انجينر شيرشاه رشاد، د بشري حقونو د خپلواك كمېسون مطبوعاتي مسئول عبدالعزيز اكرمي، ليكوال او شاعر عبدالنافع ثنا او د بېنوا فرهنګي ټولني مشر عبدالاحمد محمديار يو په بل پسې د شاولي كوټ ولسوالۍ او په مجموع كي په ټول هيواد كي د ايتلافي او ناټو ځواكونو له خوا د عامو خلګو وژني په سختو الفاظو وغندلې. او په پاى كي يې دغه لاندي پرېكړه ليك صادر كړ.
پرېكړه ليك
لومړى: د كندهار خلګ د شاولي كوټ ولسوالۍ پېښه چي د ايتلافي ځواكونو په ړانده بمبار كي د واده په خوشحالي كي راټول سلګونه كسان شهيدان او زخميان شول، په ډېره سخته توګه غندي، او عاملينو ته يې په نړيواله محكمه كي د محاكمې غوښتنه كوي.
دوهم: ايتلافي ځواكونه بايد د ولسي وګړو له مرګ ژوبلي لاس واخلي.
دريم: كه ايتلافي ځواكونه په دې پوهېږي چي د دوى مخالفين له ولسي وګړو څخه د سپر په توګه كار اخلي، نو دوى بايد له نورو پوځي تاكتيكونو څخه كار واخلي، نه دا چي پر ولسي وګړو بمبار كوي.
څلورم: په شعوري توګه عام خلګ بمبارول، ګواښل، وژل، ټپي كول، او بېځايه كول يو ترهګر عمل دئ، مرتكبين يې ترهګر بلل كېږي، چي بايد د نړيوالو حقوقي او جزايي ارګانونو له خوا په سخته توګه محكوم شي.
پنځم: د دولت مخالفان هم بايد له ولسي وګړو څخه د سپر په توګه كار وانخلي.
شپږم: د افغانستان پارلمان بايد د شاولي كوټ ولسوالۍ د پېښي په باب چپ پاته نشي، افغان حكومت، نړيوالو ايتلافي ځواكونو او نړيوالي ټولني ته د خپل اعتراض ږغ ورسوي او د دغه ډول پېښو د مخنيوي لپاره بايد جدي كړني ترسره كړي.
اووم: د كندهار ولايتي چارواكي او ولايتي شورا بايد بې تفاوته پاته نشي او په څرګنده توګه د شاولي كوټ د پېښي غندنه وكړي او د بيا تكرار د مخنيوي لپاره يې جدي كړني وكړي.
اتم: د بشري حقونو خپلواك كمېسون او نور اړوند ارګانونه بايد په پرله پسې توګه دغه بشر ضد عمل وغندي او د نورو ورته پېښو د مخنيوي غوښتنه دي وكړي.
نهم: د افغانستان د مسئلې د حل لاره جنګ نه دئ، بايد د سياسي حل پر لارو چارو صادقانه غور او هلي ځلي وشي.
لسم: د شاولي كوټ غوندي پېښو د تكرار په صورت كي به د هر ولسي عكس العمل او ناورين پړه د افغان دولت او نړيوالي ټولني پرغاړه وي.
يوولسم: څنګه چي ايتلافي ځواكونو او افغان دولت منلې ده چي د شاولي كوټ په پېښه كي ولسي وګړو ته مرګ ژوبله اوښتې ده، عاملين يې بايد محكمې ته راكش كړل شي او يوازي د جرم منل او خواشيني ښوول جبران نشي كولاى.
