خراب به دي كړي

له ډېره وخته را په دې خوا به مي د يو او بل ملګري له خولې اورېدل چې په ډېرى  (سي ډي)  پلورنځيو او حتى ګرځنده ټلېفونو كې داسې وېډيوګاني شته چې په هغه كې د افغان كډوالو مخامخ توهين او سپكاوى شوى دى او  هغه هم د يو پښتانه ؟؟؟ له خوا .

باور مي نه راته . خو د دغو وېډيو ګانو  ليدلو ته مي ډېره تلوسه پيدا شوه .

په لټه كې يې شوم چې اخير مي د سي ډي ګانو په يو دوكان كې پيدا كړې .

دغه سي ډي ګانې د پاكستان د يو وتلي ټوكمار ؟زهيرالله دي . چې  ډېرى سي ډي ګان يې د مسټر بين په خاكو ډكې دي چې ده يې پښتو ژباړه كړې ده .

لومړى به دده په ژباړه يو څو خبرې وكړم .

دده په ډېرو وېډيوګانو كې د  مسټر بين چې يو وتلى ټوكمار دى خاكي تر سرترګو كيږي. چې ده پښتو ته ژباړلې ؟ دي .

كله چې محترم ؟ زهير الله  ژباړه كوي  نو په لومړي سر كې د مسټر بين  نوم  بدل كړي او پرې د ( بابو جي ) نوم  كېږدي چې دا  كار  يې راته چندان ښه  نه برېښې .

له هغه وروسته  دده په ژباړه  زه  نور كار نه لرم چې څه وايي او څه كوي ؟ خو بايد ووايم چې  د(  مسټر بين ) د هرې خاكې په پاى كې  ده له خپله ځانه يوه داسې جمله كارولې وې  چې  دلته يې په بشپړ ه توګه په ليكلو شرم راځي .

(( تخته بابوجي ……. دي لړلي دي )).

 نه  پوهېږم  دا  څه  ډول طنز يا   ټوكي  دي ؟

خو خير په دې يې زه كار نه لرم دى پوه شه او مسټر بين .

را به شم هغې خبرې ته چې زه يې ددغه يو څو تورو ليكلو ته اړ كړى يم .

 څو ورځې وړاندې مي په خپلو سترګو د يو پاكستاني ملګري په ګرځنده ټلېفون ( موبايل )  كې هماغه ويډيو ولېده چې  ملګرو به راته ويل چې ده پكې د افغان كډوالو څرګند سپكاوى كړى دى .

ويډيو د خره په خندا پيليږي او وروسته د همدغه خره  په اواز كې يوه جمله ويل كيږي  چې:

( خراب به دي كړي) .

له دې وروسته د اوړو توبرې  ته ورته يو شى  ( نه پوهيږم څه شى دى خو زهيرالله ورته نوم خرش پرش ايښى دى )  له يوې بدشكله  نجلۍ سره چې  دواړه  په كمپيوټر جوړ شوي دي را څرګندېږي

په دې وخت كې خر سندره وايي :

( راځه چې يوه جوړه كړو جونګړه په ځنګل كي  : نو راځه )

كه دغه ځاى ته ليږ  فكر وكړو په لومړي سر كې پكې  زمونږ د خوږ  ژبې سندرغاړې ( اغلې قمرګلې ) مخامخ  توهين شوى دى .

ځكه هغې چې دغه سندره په خپل كوم  جادوګر غږ كې زمزمه كړې ده . ګمان نه كوم  چې د پاكستان تر ټولو كوم وتلى سندغاړى دي يې هم تش پېښې وكړي  . په داسې حال كې چې ده په خره ويلې ده .

ليږ وروسته (خر) راځي  (خرش پرش)  ته د هغه د نوي واده  مباركي وركوي . او ورته وايي چې :

( نوى  واده  دي  مبارك  شه  هغه  واده  چې  تا  له  مهاجرې  سره  كړى  دى ).

كاشكې خو په دغه ځاى كې ښاغلي ؟ زهيرالله له دومره عقل څخه كار اخيستى واى چې مهاجره يې همداسې پرې ايښې واې  نو به نه مالومېده چې كومه مهاجره ښيي ؟

ځكه په پاكستان كې د افغانستان پر مهاجرو سربېره  د نورو هېوادونو مهاجر هم مېشت دي .

خو ده  د  نر زوى  په  ډاګه  په  خره  باندې ويلي دي چې  د كابل مهاجره !!!!!!!!!!!!!!!
د وېډيو په بله برخه كې ( خرش پرش ) خره ته وايي چې له ماسره كابل ته لاړ شه  تر څو دغه افغانه مهاجره د پلار كور ته بوزم خو خر يې نه مني او ادعا كوي چې ګواګې په كابل كې جنګ دى ، نا امني ده او زمونږ سرونو ته خطر پښېږي .
له دې ليږ وروسته نه پوهېږم پېريان دي كه څه بلا ؟  خو كېداى شي د زهير الله موخه  ترې د پاكستان امنيتي پوليس  وي . هغوۍ هم وايي چې په كابل كې جنګ دى او مه ځۍ .

خو په  دې ټولو خبرو سربېره ( خر، خرش پرش  او هغه جينۍ )  د كابل په لوري خپل سفر پيلوي .

هلته كوم پاكستانى سندرغاړى سندره وايي :

( وه وړې مهاجرې!  لاس مه وهه په اوربل  باندي
 لاړه نه شې مړه شې بيا جنګ دى پر كابل باندي )

ډېره هڅه مي وكړه تر څو سندرغاړى  وپېژنم خو ونه توانېدم  په هر صورت  په وېډيو كې غږ  د خره  له خولي  را وزي  ا و .له دې سره سم  وېډيو  د محترم ؟  زهيرالله  په يوه  عكس ښكارولو سره پاى  ته رسيږي .

كه څه هم  زه ښاغلي ؟ زهيرالله ته  د يو انسان  په  توګه احترام لرم  خو دا  چې  ده خپل عكس له خرو سره يو ځاى كړى دى دا يې خپل كار .
 
كه وېډيو ته  په  ټوليزه  توګه نظر وشي په هر جمله كې يې  زمونږ  د  در  په  دره افغان كډوالو مخامخ سپكاوى دى .

وايي چې: (  ګيله له خپلو كيږي)  .

كاشكې خو دغه ويډيو  كوم داسې چا ،  چلولې واى چې  ليږ تر ليږه پښتون خو نه واى . نور كه نه وو  ګيله خو به مو تري نه كوله .

خو داچې يو پښتون ؟؟؟  د بل پښتانه سپكاوى په داسې  توګه كوي  د  نه  زغملو خبره  ده .

هغه هم په داسې حال كې چې  همدغه افغان كډوال  ددوى مېلمانه بلل كيږي .

دلته دا په ډاګه كېږي چې دوى  د مېلمنو څه ډول  قدر كوي .

(چې پرې  د كوډو تعويزونو هيڅ اثر نه كاوو
هغه د ټولو نجونو ميره اوس ملنګه ښكاري)

 افســــــــــــــــــــــــــــــــــــوس !!!!!!!!!!

د كابل پېغله اوس دومره خواره شوه چې پاكستانيان يې نكاح له يو خره سره تړي .

زما د وطن هغه پېغله چې د جنت په حورو مي نه وركوله اوس د پرديو كوڅو ګردونو دومره بېقدره   كړه چې اوس يې واده له خرو سره كېږي ؟؟؟

زما د هېواد هغه پېغله چې ما يې د زلفو يو وېښته په سند او پنجاب خو  پرېږده  په درست جهان نه وركاوو  نن  دومره سپكه شوه ؟

زمونږ د  نجونو ميره  نن د هغه چا له لاسه دومره سپكېږي  د چا د لاسه چې يې نېكمرغه ژوند تر داسې بېوزلۍ  را  رسېدلى دى  ؟

زما د وطن پېغله  خو به را څخه يو وخت ضرور دا  پوښتنه كوي چې  ته غوړ  برېتونه  ګرزېدې او په ما باندې  پرديو ټوكمارانو ؟  دا ډول ريشخندونه  وهل  .

ستا په ژوند كې زه  دومره بېقدره   شوم چې خلكو به راباندې مسخرې كولې او تا به يوازې  ورته  له اوښكو په ډكو سترګو كتل ؟.

ته به د ځمكې پر سر ګرزېدې او د وطن پېغله به دي خلكو خرو ته  ودوله ؟

اخير تا د كومې ورځې د پاره ژوند كاوو ؟؟؟؟؟؟؟؟؟؟؟؟؟؟؟؟

نو

اې زما د هېواد ملالې پېغلې !!!

څه وكـــــــــړم ؟ دا مهال تر تا زه  ډېر بې وسه يم  .

(زه د پردي دېوال سايې ته دادى ژوند تېروم

د وجود غړي مي د مازې څرپ له ډاره تښتي)

اوس وخت زه هم دې ته اړ كړى يم  چې  په ژړا د هغه چا د دېواله  سيورې ته كښېنم چا چې ته  له  دومره سپكاوي سره مخ كړې  يې .

ګرانـــــــــــــــــــــــي ! زما د زړه دنيا له ډېرو خبرو ډكه ده خو

افسوس  كه زه د يو څو خبرو كولو د پاره  ليږه  خوله خلاصه هم كړم نو  په هم  هاغه  ورځ  زما او ستا دښمن   ما د خپل دېوال له سيوري شړي او د تشو خبرو ځواب مي هم  په توغنديو راكوي ؟

ګرانـــــــــــــــــــــــې زه څه وكړم ؟

وايي چې :  ( د خوار او غريب  يا ژړا ده او يا هم ښېرا) 

ځكه خو زه هم ستا د  دا ډول سپكاوي انځور د تړمو اوښكو په اوو جامو كې نغاړم  او د خپل كنډواله  زړه تاخچې ته يې سپارم .

په دې هيله چې :

(په ستړو اسوېلو به يې ځواني لمبه ، لمبه شي
خندا به يې سلګۍ شي په ازار د لېونو) .

هر شپه  تر ډېر ناوخته پورې د دغه  تصوير تلاوت  كووم  .

ګوره ګرانې !  چې له ما څخه  خپه نشې  زه ډېر  بې  وسه  يم  
هو
زه

ډېـــــــــــــــــــــــــــــــــــــــــــــــــــــــــر بې وسه يم