لراوبر ویب پاڼه لراوبر يو افغان – تازه خبرونه
په قضایي ادارو کي په فساد ککړ کسان له تحقیقاتو پرته برائت اخلي”
کابل چاپ ورځپاڼو نن د خپلو لیکنو ډیره برخه د اداري فساد او په هېواد کې د ښځو پر وړاندې د تاوتریخوالي زیاتیدو ته ځانګړې کړې ده.
ملي ارمان:
ملي ارمان ورځپاڼې په یوه مقاله کې، لیکلي، په قضایي ادارو کې په فساد ککړ کسان له تحقیقاتو پرته برائت اخلي.
دې ورځپاڼې د فوایدې عامې وزیر نجیب الله اوژن هغه خبره څیړلې چې؛ ویلې یې دي، د دې وزارت کارکوونکو چې کوم کسان د رشوت په جرم نیولي، هغه محاکمو بېرته خوشې کړي دي.
ورځپاڼه د فواید عامې د وزیر په حواله لیکي، ځينې زورواکي د خپل زور یا رشوت په وسیله په لویو لارو درانه بارونه انتقالوي چې؛ د سړکونو د ورانېدو لامل کیږي.
محور:
محور ورځپاڼې په خپل یوه څیړنیز راپور کې ویلي چې؛ د حکومت د بې غورۍ له امله د امنیتي ځواکونو یوشمېر معلول افسران ګدایي کوي.
ورځپاڼې د ملي اردو د یوه دوه ویشت کلن سرتیري چې په هلمند کې یې د جګړې پرمهال دواړه پښې له لاسه ورکړي؛ کیسه را اخیستې چې دا مهال ګدایي ته اړ شوی.
د ملي اردو دغه سرتیری د پروان ولایت اوسیدونکی دی او اوس د مصنوعي پښو په وسیله یو یو ګام اخلي او وایي چې، اړ یم چې نور سوال ته لاس اوږد کړم ځکه د کورنۍ د اقتصادي مصارفو له عهدې څخه نشي وتلی.
محور د ملي اردو د یوه بل معلول سرتیري په حواله چې نوم یې نه دي ښودلی لیکي؛ کله چې د ملي اردو کوم افسر ټپي شي؛ په کابل کې یې درملنه کیږي او له درملنې وروسته که د کارکولو وس ونه لري؛ ټول امتیازات یې قطع کیږي.
د ښځو پر وړاندې د تاوتریخوالي د پیښو په اړه ملي ارمان ورځپاڼې په یوه جلا مقاله کې لیکلي چې د تاوتریخولي په وړاندې سکوت مات شوی دی.
ورځپاڼې لیکلي، په ښځو باندې تاوتریخوالی ډیر بد عواقب لري او د نورو ښځو په روح او روان هم بده اغیزه کوي.
ورځپاڼې په خپله مقاله کې لیکلي، حکومتي چارواکي، سیاسي مخالفین او هنر مندان په خپلو خبرو کې یوازې د جنسي تجاوزونو غندنه کوي؛ خو د مخنیوي لپاره یې لازم کار نه دی کړی.
سرنوشت:
سرنوشت ورځپاڼې همدې موضوع ته په اشارې لیکلي چې؛ د افغانستان په جنوب کې پر پنځه کلنې نجلې تیری کوونکی په شل کاله بند محکوم شوی دی.
دغه سزا د زابل ولایت په یوې علني محاکمه کې هغه کس ته واورول شوه چې؛ دوه اونۍ وړاندې یې د دې ولایت په شاجوی ولسوالۍ کې په یوې ماشومې نجلۍ جنسی تیری کړی دی.
ورځپاڼه لیکي، د تاوتریخوالي ډیرې کمې پیښې دي چې؛ څیړل کیږي، خو د اکثرو په تعقیب کې یې حکومتي چارواکي پاته راغلي.