کابل ته له رارسیدو سره سم دکرکټ دملي لوبډلې تود هرکلی وشو

دافغانستان دکرکټ دملي لوبډلې اتل ستوري لوبغاړي دکابل هوايي ډګر ته له را رسیدو سره سم د سلګونو پلویانو له ډیره تود هرکلي سره مخ شول، دوی یې ونازول ، ګیدۍ ګیډۍ ګلونه یې پری وشیندل او د ښار په منځ کې یې بدرګه کړل. ټول لوبغاړي په تیره بیا هستي ګل عابد سخت ونازول شو، هستي ګل چې دجرسي په وړاندې پوره میړانه وښوده له تود هرکلي سره مخ شو.

هستي ګل لر او بر ویبپاڼې ته وویل چې دی ډیر خوښ دی چې هیواد یې اتل شو هغه وویل کله چې د جرسي په وړاندې ډګر ته ننوت هغه وخت وو چې لوبډله یې نوره کمزوری شوی وه، خو دی وايي هڅه یې وکړه ډیره څه وکړي. تر یو څه ځنډ وروسته دافغانستان ولسمشر حامد کرزي دکرکټ دملي لوبډلې بریا ستایلې او ټول ملت ته یې مبارکي ورکړې، ولسمشر کرزي په خپل پيغام کې ویلي چې دی د کرکټ له اتلانو زیات خوښ دی.

په غازي لوبغالي کې ورته په رسمي ډول مراسم ترتیب شوي وو، پدی مراسمو کې دحکومت دچارواکو دګډون برسېره دولسي جرګې غړو او په کابل کې داسټرالیا سفیر هم برخه اخیستې وه. دولسمشر کرزي سلاکار او دکرکټ دفدراسیون مشر شهزاده مسعود وویل چې لوبډلې یې بې ساری بری خپل کړی، دافغانستان دکرکټ دملي لوبډلې روزونکی یا کوچ تاج ملک لر او بر ویبپاڼې ته وویل هیڅ باور یې نه راځي چې دومره ستر بریالیتوب یې ترلاسه کړی.

ټول عکسونه د لراوبر په البمونو کښي کتلائ سئ !