لراوبر ویب پاڼه لراوبر يو افغان – تازه خبرونه
د طالبانو مشر ملامحمدعمر د کوچني اختر د راتګ په مناسبت يو اوږد پيغام خپور کړئ، چي له پخوانيو وختونو خلاف يې د افغانستان د روان او راتلونکي حالت، بهرنيو پوځيانو، د بن کنفرانس، مذاکراتو، راتلونکي حکومت او ځينو نوو مسايلو ته اشاره پکښي کړې ده.
د طالبانو مشر ملا محمدعمر اخند د کوچني اختر د مبارکۍ ترڅنګ اوسني روان حالت ته داسي اشاره کړې ده: ((د اسلام او افغانستان دښمنانو سږکال د مجاهدينو د ماتي او خپل شوم هدف ته د رسېدو يو پرېکنده پړاو ګڼلى وو، خو د دوى پلانونه له اټکل خلاف ثابت سول او د تېر کال په نسبت د سر او مال ډېر زيانونه ور ورسېدل)).
ملامحمدعمر په خپل پيغام کي ويلي چي د هيواد ګوټ ګوټ ته د دوى د فعاليتونو رسېدل د دوى د برياليتوب او د بهرنيو پوځيانو د وتلو د لړۍ شروع د هغوى د ماتي معنى لري، خو زياتوي چي د امريکايي ځواکونو د محدود شمېر پوځيانو ايستل د افغانستان د ستونزي حل نسي کېداى.
نوموړي د امريکا د دايمي پوځي اډو په باب ويلي چي افغانان د بهرنيانو لږ او ډېر پوځي موجوديت ته د اشغال په سترګه ګوري، او په عيني وخت کي يې د هيواد پر علمي، سياسي او مخورو شخصيتونو ږغ کړى، چي په دې باب له طالبانو سره مشترک ملي موقف خپل کړي.
په پيغام کي راغلي چي دوى يو داسي اسلامي نظام غواړي چي د هيواد د ټولو اوسېدونکو دپاره د باور وړ وي، ټولي پرګنې ځاى پکښي ولري، کار اهل کار ته وسپارل سي، د نړۍ او سيمي له هيوادونو سره د متقابل احترام او ملي او اسلامي ګټو پر بنسټ اړيکي ولري.
د طالبانو د مشر په دې پيغام کي په لومړي ځل د افغانستان اقتصادي پياوړتيا ته اشاره سوې ده.
نوموړي ويلي چي افغانستان د زارعت لپاره پراخي مځکي، غني معادن او د انرژۍ پراخ منابع لري، چي که د سولي په حالت کي په دې برخه کي پانګونه وسي، افغانان کولاى سي د فقر، بېکارۍ، اقتصادي او اجتماعي ستونزو څخه ځان په خلاص کړي.
ملامحمدعمر ويلي چي طالبانو هيڅکله د قدرت په موضوع کي له انحصار څخه کار نه دئ اخيستى، افغانستان د ټولو افغانانو کور دئ او هر افغان يې په ساتلو او سمبالولو کي د مسئوليت د ادايني حق لري. همدا راز زياتوي چي راتلونکي بدلونونه بايد د مجاهدينو د راتګ په څېر نه وي چي د هيواد ټولي دولتي ادارې تخريب او چور سوې.
ملامحمدعمر ويلي چي د دوى د برياليتوب په صورت کي به د ټولو ملي شمتنيو، دولتي ادارو، او په خصوصي سکتور کي د رامنځته سويو پرمختګونو ساتنه وسي او ملي تجاران به د هيواد خدمت ته نور هم وهڅول سي.
په پيغام کي په لومړي ځل منل سوې چي طالبانو د بنديانو د تبادلې په باب ځيني تماسونه ټينګ کړي دي، خو وايي دا د اوسنۍ لانجې په باب هر اړخيز مذاکرات نسي بلل کېداى، اما دا يې نه دي ويلي چي دغه تماسونه له افغان حکومت او که بهرنيانو سره نيول سوي دي.
د ملامحمدعمر په دې پيغام کي د بن راتلونکي کنفرانس ته هم اشاره سوې چي وايي د پخوانيو په څېر به دا هم بې نتيجې وي، ځکه چي د هيواد او ولس رښتيني استازي به برخه پکښي ونلري، او څه چي د سپيني ماڼۍ او پنټاګان خوښه وي هغه به ترسره سي.
د طالبانو مشر پر بهرنيو هيوادونو ږغ کړى چي له افغانستان څخه پوځيان وباسي او په دې صورت کي دوى حاضر دي، چي د يوه سوله خوښي او ذمه وار نظام په حيث د نړۍ له ټولو هيوادونو سره مثبتي اړيکي وساتي. همدا راز د افغان حکومت پر مامورينو ږغ سوى چي د ده په وينا د يرغلګرو له ملاتړه لاس واخلي او له طالبانو سره اوږه پر اوږه ودرېږي.
ملامحمدعمر په خپل پيغام کي له طالبانو غوښتي چي په خپلو چارو کي غفلت ونکړي، د خپلو اميرانو اطاعت وکړي، له ولس سره ښه چلند وکړي، د خلګو د نيکو مشورو او نظرياتو پوره خيال دي وساتي.نوموړي له طالبانو غوښتي چي تر هغو د مشرانو له خوا امر نه وي ورته سوى له ځانه دي پر خلګو امرونه او بنديزونه نه تحميلوي.
همدا راز ويل سوي په دوى پوري مربوط هيڅ يو څوک اجازه نلري چي له چا څخه د توپک په زور پيسې واخلي او که بل څوک دغه کار کوي، طالبان مکلف دي چي مخنيوى يې وکړي.
د اعلاميې په پاى کي د هيواد د پوهنتونونو پر استادانو، محصلينو او روڼ اندو باندي ږغ سوى چي د هيواد ښه راتلونکى په خپلواکۍ پوري تړلى دئ، بادار هيڅکله د غلام خير نه غواړي، او همېشمه غلام د يوې حربې يا وسيلې په توګه استعمالوي.
نوموړي ويلي چي بهرنيانو په دې لس کاله کي نه د اوبو او نه هم انرژۍ په برخه کي يوه داسي پروژه عملي کړې چي د هيواد اقتصاد پر پښو ورسره ودرېږي، بلکي برعکس يې د افغانانو ترمنځ قومي او سمتي توپيرونو رامنځته کولو ته زور ورکړى او ځوانان ژبنيو او سمتي جګړو ته هڅوي.
ملامحمدعمر د خپل اوږده پيغام په پاى کي د افغانستان او نړۍ پر ولسونو ږغ کړى چي په مال، ژبه او قلم د دوى د مبارزې ملاتړ وکړي.