لراوبر ویب پاڼه لراوبر يو افغان – تازه خبرونه
تر څو به غرغنډه وي مال او سر د پښتنو
په ژوند به یو ځل اوینم اختر د پښتنو
له یو بل ځاریدل وو څومره ښه کلي والي وه
خبره د تندي وه داسې نه چې د تالي وه
سینه به د بغضونو نفرتونو نه خالي وه
غمونه به شریک وو هم شریکه خوشالي وه
افسوس چې نن هیر شوی دا هنر د پښتنو
په ژوند به یو ځل اوینم اختر د پښتنو
که پت به يې جامه وه نو الفت به يې عادت وو
واړه غوندې وجود کې به د غره هومره همت وو
په ژبه غوڅیدو يې کله پریخی صداقت وو
حجره د پښتنو کې به څه ښکلی عدالت وو
اشر دی تالا شوی هم ګودر د پښتنو
په ژوند به یو ځل اوینم اختر د پښتنو
میلمه به د پښتون د پاره د پاره زیری د اختر وو
وفا به د پښتون بچي د پلار نیکه دوتر وو
په کشر کې حیا وه هم په مشر کې اثر وو
مطلوم له دلاسه وه د ظالم سره ډغر وو
نعره د اتفاق وه لر او لر او بر د پښتنو
په ژوند به یو ځل اوینم اختر د پښتنو
په ګل وطن کې اوسې پرې بهیږي دریابونه
په شنو ځنګلو پټ دي ستا د غرونو دنګ سرونه
په خاوره کې دې کیږي رنګارنګ میوې فصلونه
دا دشتې دې د سرو زرو کانونه دي کانونه
اغیارو خیتې وکړې په دوتر د پښتنو
په ژوند به یو ځل اوینم اختر د پښتنو
د بل په لاس لوبيږو هم جنګیږو مړزان یو
ملګرو مونږه ټول د تباهۍ په لور روان یو
مونږ ټول د پښتنې ژبې په خپله قاتلان یو
دا مونږه د راتلونکي نسل ځکه مجرمان یو
سبارلی مو اغیار ته مقدر د پښتنو
په ژوند به یو ځل اوینم اختر د پښتنو
په لر او بر ویشلی يې وجود ته دې خطره شوه
نن ستا د اتفاق لوړه ماڼۍ ایره ایره شوه
خاوند يې د سرو سپينو ولې برخه دې سپیره شوه
پښتونه ستا په درمند د اتڼ قیصه متره شوه
لټومه عندلیب چرته سنګر د پښتنو
په ژوند به یو ځل اوینم اختر د پښتنو
