لراوبر ویب پاڼه لراوبر يو افغان – تازه خبرونه
د ويکي ليکس له خوا په خپرو سويو پټو اسنادو کي د افغانستان د ولسمشر پخوانى مرستيال احمدضياء مسعود ياد سوئ، چي تېر کال يې دوبۍ ته سفر وکړ او له کابل څخه يې ٥٢ ميليونه ډالره ورسره يووړل.
راپور وايي د ضياء مسعود دغه پيسو معلومات د امريکا د مخدره موادو ضد ادارې ته په لاس ورغلي وو.
ويکي ليکس ويلي سره له دې چي ضياء مسعود له دې پيسو سره يوځاى ونيول سو، خو نوموړي ته د پيسو د انتقال او ورسره ساتلو اجازه ورکړل سوه او هيڅ راز تحقيقات ځني ونسول، چي نوموړي دغه پيسې له کومه کړي او پر کومه يې وړي.
بايد وويل سي چي احمدضياء مسعود او د ولسي جرګې رئيس محمديونس قانوني څلور کاله دمخه هم په دوبۍ کي له ميليونونو ډالرو سره نيول سوي وو، چي وروسته د افغانستان د ولسمشر حامد کرزي په غوښتنه خوشي سوي وو.