لراوبر ویب پاڼه لراوبر يو افغان – تازه خبرونه
مهترلام ( د تلې ٢٤مه ٨٩ ۱۳) : د افغان –انګليس د لومړۍ جګړې اتل او نومیالي غازي محمد شاه خان بابکرخېل ياد د هغه په اصلي ټاټوبي لغمان کې، د يوه علمي سيمينار له لارې تازه شو.
دغه يو ورځنى سيمينار، چې د لغمان میشتو فرهنګيانو له خوا د ولايت په مېلمستون کې جوړ شوى و ، چې د ګڼو ولايتونو ادب پالو،شاعرانو او ليکوالانو هم په کې ګډون کړى و.
د تاريخي رواياتو له مخې، اتل غازي د وزير محمد اکبرخان له نږدې ملګرو څخه و.
محمد شاه خان بابکرخېل له هغو ملي مبارزينو څخه و، چې د کابل د جرګې د مشرانو په مشوره يې د خپل قوم او عبدالعزيزخان جبارخېل په ملتيا په ګندمک ، جګدلک او تهزين کې د کابل –جلال آباد لويه لاره په انګريزانو بنده کړه او پر هغوى يې مرګوني ګوزارونه وکړل .
محمد شاه خان بابکرخېل د مکناټن په وژلو کې هم اغېزمن رول ولوباوه او هم يې په خپله لويه کلا کې، چې عقل تمامه يې بلله، ګڼ شمېر انګريزان د بنديانو په څېر ساتلي و.
د پښتو ژبې تکړه لیکوال او نوموتي شاعر الحاج پيرمحمد کاروان ، چې په دغه سيمينار کې يې ګډون کړى و، دغه شان سيمينارونه د ملي او تاريخي شخصيتونو په راپیژندلو کې ارزښتمن وبلل .
هغه وویل : (( موږ لوى- لوى شخصيتونه لرو او له هغو څخه ډير څه موږ ته په ميراث پاتې دي ، خو موږ له هغوى نه ناخبره يوو، چې په داسې غونډو سره د هغوى له ژوند او مبارزو خبرېږو.))
په سيمينار کې د محمد شاه خان بابکرخېل د کورنۍ غړي ، ليکوال او شاعر اورنګ زيب ارشاد ،د هغه په مبارزو او ملي شخصيت علمي مقاله ولوسته .
د پښتو ژبې مشهور ليکوال پوهاند ډاکټر مجاور احمد زيار ،استاد محمد اصف صمیم ،د افغانستان د ملي راډیو تلویزیون عمومي ریس زرین انځور او يو شمېر نورو ليکوالانو هم د بابکرخېل په ملي مبارزو خبرې وکړې .
د بينوا فرهنګې ټولنې مسوول محمديار يار وویل چې داسې سیمینارونه د ځوانو فرهنګيانو ترمنځ د پېژندګلوۍ لپاره ډير ارزښتمن دي .
ددانش خپرندويې ټولنې مشر اسدالله دانش ، چې ددغه سيمينار په جوړولو کې يې ونډه درلوده ، وويل : (( دغه غونډه مو ددې هدف لپاره برابره کړې وه، تر څو خپل مخور شخصيتونه ولس ته په ډاګه کړو.))
د سيمينار په پاى کې د لغمان د والي محمد اقبال عزيزي له خوا ټولو مېلمنو ته يوه یوه لنګۍ او يوه بکسه کتابونه ډالۍ شول.
