لراوبر ویب پاڼه لراوبر يو افغان – تازه خبرونه
طالبان وایی چی د کونړ ولایت د ماڼوګي ولسوالۍ د کنډیګل په سیمه کی یوه بی پیلوټه جاسوسی طیاره چی په ټیټه ارتفاع کی الوتې وه ، وویشتل سوه او ټوټې یې د عمار په کلی کی اوس هم پرتې دي .
طالبان په یو بل خبر کی وایی چی د کابل ولایت د سروبی ولسوالۍ د وریښمین تنګی په سیمه کی یې د بهرنیو ځواکونو یوه قرارګاه په ۲۵ هاوان ګولیو ویشتلې او د مالی زیان تر څنګ یې شپږ خارجی او څلور داخلی پوځیان هم وژلي دي چی د دواړو ځواکونو تر منځ غونډه روانه وه .
د طالبانو د یو بل خبر له مخی هغوی د زابل ولایت د نوبهار ولسوالي د نیلۍ له کلی سره د امریکایی ځواکونو د ګزمې یو ټانک په ماین والوزاوه او پکښی سپاره ۵ پوځیان یې ووژل چی وروسته هلیکوپترونه راغلل او مړي یې انتقال کړل . خبر زیاتوی چی د هلمند ولایت د ګریشک او نوزاد په ولسوالیو کی هم څلور امریکایی ټانکونه او د هغوی سپرلي له منځه وړل سوي دي .