پېښور: پسرلنۍ مشاعره او د مهترلام بابا ټولنه جوړه سوه

خيبرپښتونخوا ( پېښور ) : د افغانستان ادبي انجمن د افغانستان اسلامي فرهنگي مرکز په انگړ کې پسرلنۍ مشاعره د هېواد نامتو شاعر، ليکوال او کالم ليکوونکي قتيل خوږياڼي په صدارت کې وکړه. د غونډې مشران ميلمانه هر يو په پېښور کې د افغانستان د عالي لېسو د مديرانو د شورا رييس زبېر سيار، د مولانا جامي عالي ليسې مدير ډيپلوم انجنير رحمت الله بارکزى، پوهنمل زاهدي احمدزى، الحاج احمد شاه پوپلزى او حاجي فريد ټاکل شوي ول. د ميلمنو سره د کوربه په حيث د افغانستان اسلامي فرهنگي مرکز مشر قاضي صاحب محمد حسن اسلامي ناست و. غونډه قاري صاحب قدرت الله د قرآن کريم د څو مبارکو آيتونو په تلاوت سره پېل کړه. د غونډې د ويندويۍ چارې د خاطرې مجلې مرستيال روئيد همت ترسره کولې. قاضي صاحب محمد حسن اسلامي خپله پرانسته وينا د غونډې گډونوالو ته واوروله. غونډې ته د اى وي ټي خېبر چينل د خبرونو د څانگې استازى او د ورځپاڼې خبرونه مرستيال سراج عارف صاحب او د هغه همکار کېمره لگولې وه. د ډيوه راډيو استازى محمد داؤد جبارخېل هم د پروگرام خبر ډيوه راډيو ته برابر کړ.

په پېښور کې دمهترام لام بابا ادبى ټولنه پرانيستل شوه

پېښور :  په پېښور کې د افغانانو ځانگړې فرهنگي ټولنه (مهترلام ادبي ټولنه) پرانيستل شوه. له ډېره وخته په پېښور کې د افغانانو د ادبي ټولنې تشه راڅرگنده شوه، چې له مخې يې يو شمېر تاندو ځوانانو له خوا د ١٣٨٩ هـ . ش د وري د مياشتې ٢٧ مه چې د ٢٠١٠ ميلادي کال د اپريل له ١٦ مې سره برابره وه په پېښور کې د مهترلام بابا ادبي ټولنې په نوم يوه ځانگړې فرهنگي ټولنه پرانيستل شوه. په دې اړه د پېښور د بورډ د زيارت تمځي ته څېرمه د پي سي ايس په کالج کې د لرې او برې پښتونخوا د نامتو ليکوالو لخوا غونډه وشوه، چې مشري يې د افغانستان نامتو ليکوال، شاعر، ژورنالست او د ساپي پښتو څېړنو او پراختيا مرکز مشر کتونکي عبدالرؤف قتيل خوږياڼي کوله. په دې مهال د کوزې پښتونخوا بل نامتو ليکوال سيد صابر شاه صابر د مشر ميلمه په توگه په ستيج ناست و، چې ورسره په څنگ کې د آزاد پښتو ادبي تحريک مشر رامداد رهبر او د نوموړي تحريک جنرل سيکرټري سکندر شاه اپريدى هم د ميلمنو په کتار کې ناست وو. د غونډې تلاوت لپاره محمد نور اپريدى راوغوښتل شو. له تلاوت څخه وروسته د کوزې پښتونخوا شاعر، ليکوال او د بې شمېره ايوارډونو ترلاسه کوونکى سيدصابر شاه صابر، سکندر اپريدى، رامداد خان رهبر، فدا محمد اکاخېل او عبدالرؤف قتيل خوږياڼي خبرې وکړې او د مهترلام بابا ادبي ټولنې جوړښت يې د پښتو ادب د ودې او پرمختگ په لاره کې ستر گام وگاڼه او زياته يې کړه، چې دغه تاند ځوانان به وکولاى شي، چې د دغې ټولنې له لارې د پښتو ادب او پرمختگ لپاره هلې ځلې وکړي. د نوموړې ټولنې د پرانيستو پټۍ د هېواد د نامتو ليکوال عبدالرؤف قتيل خوږياڼي، سيد صابر شاه صابر او سکندر اپريدي لخوا غوڅه کړې شوه. د يادونې وړ ده چې د دغې ټولنې بنسټوال او مشر نظير الحق قريشي او مرستيال يې عبدالوهاب څاروان ټاکل شوي دي. د ټولنې د ښه پرمختگ لپاره لاندې غړي هم په گوته کړې شول : ١_ د بهرنيو اړيکو مسوول خليل الله قتيل زوى ٢_ د کورنيو اړيکو مسوول حاجي گل آغا شهباز ٣_ د مالي چارو مسوول روئيد همت. ٤_ درسنيو مسوول فضل قادر انډيوال. ٥_ د وياندوۍ چارې عبدالوها څاروان. استازي : ١_ په پېښور کې : ملنگ غر، الفت سيال، نصرت الله دوديال، صفي الله سنگين. ٢_ په بلجيم کې : جلال امر خېل، فضل ربي رستم. ٣_ په جلال آباد کې : عبدالوهاب باور، عمران خان احمدزى، معلم احمد خپلوان، ٤_ په خوست کې : نقيب الله سحر، ٥_ په لغمان کې : شيرزاد ساپى، شهزاده شيرين زوى، ٦_ په زابل کې : رحمت الله سمسور. نظيرالحق قريشي څرگنده کړه، چې دغه ټولنه به په خپل روان بهير کې د کوزې او برې پښتونخوا د نامتو ليکوالو او شاعرانو د ژوند په بېلا بېلو اړخونو غونډې او سيمينارونه کوي. هغه که ژوندي دي او يا مړه شوي دي. په دې ټولنه کې به د هر ډول فکر څېښتن په آسانۍ کولى شي چې خپل نظر او اند د شعر، نثر او يا لنډې کيسې په بڼه وړاندې کړي. هيڅ ډول سياسي اړخ نه لري او نه کومه ځانگړې مالي سرچينه لري او د ټولنې د غړو پر مالي مرسته به خپل پروگرامونه پلي کوي. دغه ټولنه به د هرې جمعې په ورځ د پېښور د بورډ د زيارت په تمځي کې اوونيزه غونډه کوي او د پرېکړې له مخې به په مياشت يا دوه مياشتو کې لويې ادبي غونډې ترسره کړي. د ټولنې نورو غړو نظير الحق قريشي ته باور ورکړو، چې تا سره به په گډه کار کوي ترڅو د پښتو ادب پرمختگ وکړي.په پاى کې ازاده مشاعره وشوه او غونډه دتحسين الله تحسين له خوا په دعايه پاى ته ورسيده .