لراوبر ویب پاڼه لراوبر يو افغان – تازه خبرونه
نن په لښكرګاه كې دوه كسان چې بوغرې يې اغوستې وې او غوښتل يې پر يوه امريكايي مرستندويې ادارې ځانمرګي بريدونه وكړي د نوموړي دفتر د ساتونكو له خوا تر بريد كولو وړاندې ووژل شول.
دغه دوه نارينه چې د ښځو بوغرې يې په تن وې پر ساتونكو يې ډزې پيل كړې، چې د هغوى له خوا په ځوابي ډزو كې له منځه لاړل.
د كورنيو چارو وزارت چارواكو ويلي چې په دې پېښه كې كې بل چاته ځاني زيان نه دى اوښتى، خو د هلمند وياند داود احمدي بيا ويلي چې په دې پېښه كې دIRD دوه كاركوونكي ټپيان شوي دي.
دغه موسسه د كرنې په برخه كې مرستې كوي، همدارنګه بزګرو ته د هغوى د عوايدو لپاره بازار پيدا كوي.
دا لومړى ځل نه دى چې په افغانستان كې د دولت او بهرنيو ځواكونو د مخالفو ډلې خلك له ښځينه بوغرې څخه پخپله جګړه كې ګټه اخلي.
د طالبانو د مشر ملامحمد عمر اخوند په اړه هم ويل كيږي چې پر افغانستان د ناټو او امريكايانو له بريد وروسته يې د ملابرادر اخند په ټينګار ښځينه بوغره (برقه) پر سر كړې وه او له همدې لارې يې ځان ژغورلى و.