لراوبر ویب پاڼه لراوبر يو افغان – تازه خبرونه
د هیواد په ګرمو سيمو كې د پيليدونكي تعليمي كال په مناسبت د پوهنې د وزير پيغام
د پالونكي خداى(ج) په سپيڅلي نامه
السلام عليكم ورحمت الله وبركاته!
وياړم چې د افغانستان اسلامي جمهوريت، د پوهنې وزارت د مشرتابه هيئت په استازيتوب، تاسې ټولو درنو هيوادوالو، ښوونكو او زده كونكو ته د هيواد په ګرمو سيمو كې د نوي پيليدونكي تعليمي كال د را رسيدو له امله مباركي دركوم.
څيړنو او تجربو ښودلې ده چې د يوه هيواد پرمختګ، سوكالي او ښې رازي يوازې په ولس كې د باسواده او تعليم يافته وګړو تر موجوديت پورې پييلې ده او له دې پرته هيڅ مملكت نه دى توانيدلى چې د پر مختللو هيوادونو په ليكه كې ودريږي.
د افغانستان اسلامي جمهوريت د پوهنې وزارت چې د يوه متوازن معارف د رامنځ ته كولو په برخه كې يې خپله ملي او ديني وجيبه درك كړې ده، روان ۱۳۸۸ كال ته يې د پوهنې د كيفيت د بهبود نوم وركړى او له خپلو ټولو درنو، علماء كرامو، قومي مخورو او هيوادوالو څخه غوښتنه كوي تر څو په خپل سر او مال سره له ښوونكو، زده كونكو او د ښوونځيو د حريم ساتنه وكړي او په دې توګه خپل اسلامي مكلفيت ترسره كړي.
هيله ده چې د هيواد په ګرمو سيمو كې به په دغه تعليمي كال كې ترسره كيدونكي پوهنيز فعاليتونه د ګران افغانستان، هر اړخيزې سوكالۍ، پرمختك او ښې رازۍ ته زمينه برابره كړي.
په احترام
