لراوبر ویب پاڼه لراوبر يو افغان – تازه خبرونه
د اګسټ د مياشتي پر ۹ مه نېټه د جرمني د کولن په هورت ښارګوټي کښي د افغانستان د کلتوري ودي ټولني د (ځوانانو څانګي) چي تازه جوړه سوې ده؛ په نوښت او هلو-ځلو سره په لومړي ځل د لمرګل لويه او شانداره مشاعره جوړه سول؛ چي د جرمني د ګوټ-ګوټ ترڅنګ پکښي د اروپا دنوروجرمني-ګاونډه هيوادونو څخه هم ځوانو شاعرانو، پېغلو، زلمو او د شعر او ادب مينه والو او فرهنګيانو ګډون درلودئ .
د لمرګل لويه مشاعره د اګسټ د مياشتي پر ۹ مه نېټه پر ځايي وخت ماښام اتو بجو د ځوان قاري عابدالله جان ساپي له خوا د قرانکريم د څو مبارکو اياتونو په تلاوت سره پېل سوه .
تر تلاوت وروسته د افغانستان ملي سرود واورول سو چي برخوالو يې په ولاړېدلو درنښت وکړ .
وروسته د غونډي پرانستونکي عبدالله احسان ټولو راغلو برخه والو ته ښه راغلاست ووايه او په لنډ ډول د غونډي د اجنډا په اړه وږغېد، دلمر ګل دې لويي مشاعرې ته پر افغانستان سربېره له پښتونخوا، هالنډ، بلجيم، لندن او جرمني -ميشتو بېلابيلو کلتوري ټولنو څخه د مبارکۍ بېلابېل پيغامونه هم رارسېدلي ول .
د لمرګل مشاعره د خپلي اجنډا له مخي پر دريو برخو وېشل سوې وه :
لومړی برخه : د تکړه شاعر او ليکوال ښاغلي افضل ټکور په ويندويي د ښاغلي علي ګل پيوند سره څو شېبې
دوهم برخه : ازادي مشاعرې ته ځانګړې سوې وه چي د کامله طاهر او ښاغلي اجمل طاهر په ښکلې ويندويي سره مخته بېول کېدل .
دريمه برخه : ټنګ ټکور او د زلمو مست اتڼونه وو چي د تکړه سندر غاړي انجينر لطيف راهي او ښاغلي ميوند لعلپوروال په ښکلو نغمو سره ښکلې سوې وه چي په تبله کي يې همکاري ښاغلي عبيد جان نوابي او په رباب کي يې همکاري ښاغلي مثل خان شينواري کوله .
ورپسې ځوان ژب پوه او ختيځ پوه ښاغلي ز مري خان (سېبستيان هاينه) ته بلنه ورکړل سوه چي برخوالو ته په پښتو ژبه خپله وينا واوروي، ښاغلي زمری خان چي د افغانستان د کلتوري ودي ټولني د (ځوانانو څانګي) فعال غړئ دئ؛ د ژبو په زده کړه کښي ځانګړی نبوغ او استعداد لري، په ۴۰ بېلابيلو ژبو باندي خبري، ليک، لوست او څېړنه کولائ سي چي اوس لګيا دئ څو په دې برخه کښي خپله دوکتورا په پښتو ژبه کښي ترلاسه کړي .
ښاغلي زمري خان په پښتو زړه راښکونکې وينا برخوالو ته واورول چي د برخوالو په تودو چکچکو سره بدرګه کېدل ؛ ده د پښتو ژبې سره د خپلي لېونۍ ميني احساسات هم پښتنو ته په پښتو ژبه څرګند کړل .
زمري خان پر پښتنو نيوکه هم وکړل، ده وويل ول له بده مرغه يو او نيم پښتانه ولي پخپله پښتو باندي وشرميږي، ولي پخپله ژبه هېروي او خبري په و نه کړي، ده وويل چي د يو قام هويت خو همدا ژبه او کلتور وي، ده پر پښتنو ږغ وګړ چي راوپاڅئ او پښتو د نورو نړيوالو ژبو سره پر څنګ ودورئ !
ورپسې دافغانستان د کلتوري ودي ټولني په استازيتوب ښاغلي استاد سيدحسن ته بلنه ورکړل سوه، هغه راغلو ميلمنو ته ښه راغلاست او د افغانستان د کلتوري ودي ټولني د (ځوانانو څانګي) د ځوانانو هلي-ځلي يې و ستايلې او هغوی يې لا تشويق کړل .
ورپسې د لمرګل د شاعرانه ماښام ځانګړي مېلمه او وتلي شاعر ښاغلي علي ګل پيوند ته بلنه ورکړل سول څو د سټېج خوا کښي جوړي کړل سوي ځانګړي، ښکلي شاعرانه دېرې ته تشريف راوړي .
د دېرېد ويندويي چاري افضل ټکور مخته بېولې؛ ټکور دېرې ته د مېلمه تر څنګ تکړه ليکوال او ژورنالست ښاغلي عبيدالله محک ، ليکوال ، کيسه ليکونکي او کره کتونکي ښاغلي زرين انځور ، د ملي تلويزيون رئېس طنز او سناريو ليکونکی ښاغلی واحد نظري ته هم بلنه ورکړهڅو دېرې ته تشريف راوړي .
په ديره کښي د ښاغلي علي ګل پيوند د شعر او شاعرۍ ترڅنګ د يو بل سره زړه خواله او ادبي بحثونه وکړل سول چي په بکګراونډ کښي يې ښکلې موسيقي او د پيوند صيب غزليزي سندري هم ځای سوې وې؛ د دېرې برخوالو د ښاغلي علي ګل پر شعر او شاعرۍ باندې له بيلو-بيلو اړخونو خبري او کتنه وکړل .
انځور صيب د پيوند صيب يو ښکلې بيت هم برخوالو ته واوراوه چي وايي :
په کليمه خو ناپاکان خپل ګناهونه وينځي
ماته په وخت د ځکندن يوه ټپه ووايه
تر دې ادبي دېرې وروسته د جرمني د کولن په هورت ښارګوټي کښي د اېونټ پالاس د ښکلي هوټل څښتن (چي چي د نوروفرهنګي غونډو ترڅنګ همدا د لمرګل لويه مشاعره هم پکښي ترسره سول)ښاغلي ډاکتر شيرعلي خان شيراو ته بلنه ورکړل سوه چي برخوالو ته يې يو ځانګړی زيری درلودئ .
د ښاغلي ډاکتر شيرعلي خان شيراو زيری برخوالو ته د ټول پښتو لر او بر ټلوېزيوني چېنلونو په اسانۍ سره د ليدلو-کتلو اړوند يوې تخنيکي آلې د جوړېدو په اړه وو .
ښاغلي ډاکتر شيرعلي خان شيراو يو داسي تخنيک په کار اچولئ وو چي په هغه کښي خاصه ډاټا ځای سوې وه څود انټرنېټ په مټ ټول افغان پښتو لر او بر ټلوېزيوني چېنلونه په ډېري اسانۍ سره د پردې او ټلوېزيون پر مخ راښکاره کړل سي .
د انټرنېټ په مټ ټول افغان پښتو لر او بر ټلوېزيوني چېنلونه کتلائ سئ
د ښاغلي ډاکتر شيرعلي خان ددغه نوښت د زيري سره سم د هغه عملي پرانستنه هم برخوالو ته پر پرده باندي په ژوندۍ بڼه د خيبر او شمشاد چېلنونو په ښودلو سره ترسره سول، چي د ښاغلي ډاکتر شيرعلي خان ددې تخنيکي آلې په استعمال سره به ټول افغان پښتو لر او بر ټلوېزيوني چېنلونه په ډېري اسانۍ سره د نړۍ په هر ګوټ کښي د کتلو وړ وي چي پدې سره به ټول بهرميشتي افغانان د خپلي ژبي او کلتور سره لا نژدې پاته سي .
د ښاغلي ډاکتر شيرعلي خان تر زيري او تخنيک تر مشاهدې وروسته برخوالو ته د تفرېح موقع ورکړل سول .
تر نيم ساعته تفرېح وروسته ازاده مشاعره پېل سول چي د کامله طاهر او ښاغلي اجمل طاهر په خاصه ويندويي سره پر مخ بېول کېدل، په مشاهره کښي د پخ شاعرانو ترڅنګ ځوانو شاعرانو، پېغلوشاعرانو او تنکيو شاعرانو هم برخه لرل چي هريوه يې خپل دوه او درې شعرونه چي د برخوالو له خوا په تودو چکچکو او يو ځل بيا – يو خل بيا سره بدرګه کېدل .
تر ازادي مشاعرې وروسته د مستو اتڼوڼو او ټنګ ټګور برخه چي د تکړه سندر غاړو هريو انجينر لطيف راهي او ښاغلي بهرام او ميوند لعلپوروال په ښکلو سندرو او نغمو سره پېل سول .
په پای کښي د مستو اتڼوڼو او ټنګ ټګور وروسته د افغانستان د کلتوري ودي ټولني د (ځوانانو څانګي) د نوښتګر ځوان ښاغلي خوشال انځور له خوا ددې ټولني د ځوانانو څانګي خاصه جوړه سوې ډالۍ د لمر ګل د شاعرانه ماښام ځانګړي مېلمه او وتلي شاعر ښاغلي علي ګل پيوند ته ورکول سوه .
د لمرګل د شاعرانه ماښام لويه او په زړه پوري مشاعره د شپې ۲:۳۰ دوې نيمي بجې پای ته ورسېدل .
پاته دي نه وي چي د لمرګل لويه مشاعره به که خدای کول همدارنګه په راتلونکي کښي هم لا درنه او رګينه کيږي .
|
