عبدالباري جهاني : چاته به رایه ورکوو ؟

آزموده را آزمودن خطاست

 د جمهوریس حامد کرزي د قدرت اته کلني دورې هیواد ته یوازي بدمرغي، د جنایت کارانو او جنګ سالارانو واکداري، اداری فساد او په نتیجه کی په تېره بیا د پښتنو په سیمو کی بې امنیتی او تباهي راوړه.

 جمهوریس حامد کرزي ، د خپل لومړي مرستیال په حيث، د جنایت سالار قسیم فهیم په ټاکلو سره، د ټول ملت ارادې او حيثيت ته سپکاوی وکړ. د هغه لپاره یوازي د خلیلی، دوستم او نورو فاسدو همکارانو جنایتونه بس نه وه ، چی لا یې فهیم هم د ځان سره ملګری کړ. کرزی به ملت ، په تېره بیا پښتنو ته څه جواب ورکوی. ځکه چی هغه په دې اته کلنه دوره کی پرته له دې چی د خپلو غوړه مالو دوستانو او د کورنۍ د غړو جېبونه په غیر مشروع پیسو ډک کړي دي ، پخپله یې د افغانستان د پخواني او معاصر تاریخ د تر ټولو بې ارادې، بې ادارې او کمزوري مشر په حيث د ارګ په طلایی قفس کی ژوند غوره کړی دی بل هیڅ نه دي کړی. د ده په اته کلنه دوره کی د هیواد ، په تېره بیا پښتنو، د کلیو او بانډو پر بېګناه خلکو باندی ، تقریبا هره ورځ، بمباری سوي دی، د خپلو پلرونو او نیکونو خاوره ورته سره تبۍ ده او ګټه یې یوازي د ده تر بشپړی حمایې لاندی مخدره موادو د قاچاقبرانو ، چی څو ورځی مخکی یې پنځه تنه، قانون او قضا ته د ټولی بې احترامی په کولو سره ، خوشی کړل، جېبونو ته ځی. کرزي پخپله ټوله اته کلنه دوره کی ، د ګوتو په شمېر، پنځه اهل او پاک کسان نه دي مقرر کړي. په عوض کی یې په زرهاوو فاسد عناصر په کار ګمارلي او د ټولو فاسدو عناصرو تر شا ولاړ دی.

 د ده په مقابل کی ډاکټرصاحب اشرف غني، ځان د جمهوری ریاست د مقام دپاره کاندید کړی دی. ډاکټر صاحب اشرف غني دغه ګړی د هیواد د پښتنو تر ټولو پوه او هوښیار عنصر دی. هغه د مالیې د وزارت په تقریبا دوه کلنه دوره کی خپل لیاقت او اهلیت په اثبات ورساوه ، لږ ترلږه یو فاسد او بېکاره مامور یې مقرر نه کړ او د ده د اداری فساد او رشوت خوړلو په باب تر اوسه پوری یوه دښمن او مخالف څه نه دي ویلي. د هغه دوه تنه مرستیالان، که څه هم چی د اداری کار سابقه به نه لری، خو دواړه لږترلږه پاک خلک دی او لاسونه یې د کرزي د همکارانو او دوستانو، فهیم، خلیلی او دوستم په څېر د سل هاوو او زرهاوو بېګناه انسانانو په وینو نه دي لړلي.

 پښتنو ځوانانو، لیکوالانو، شاعرانو او منورینو ته زما مشوره دا ده چی د ډاکټر صاحب اشرف غنی تر شا ودرېږی. زما په عقیده هغه د مبارزې په اوسني میدان کی تر ټولو لایق او مستحق سړی دی او که بریالی سی زه باور لرم چی ځوانان او خلک به پر خپل انتخاب باندی پښېمانه نه سی.هیواد والو، په تېره بیا پښتنو، ته زما توصیه دا ده چی د کرزي د بل ځل انتخابېدلو مخه ونیسی. د هغه بل ځل انتخاب د هیواد ، په تېره بیا پښتنو دپاره ، داسی بدمرغي راولي چی جبران به یې په پنځوس کاله ونه سی. ځوانانو ته زما توصیه دا ده چی که چېری د ډاکټر صاحب اشرف غني ملاتړ کوی نو ژبی او قلمونه مو جاري کړی. مقالې ولیکی، غونډی وکړی، خلکو ته ورسی ، بازارونو ته راووزی او په هره وسیله چی کېږی خپل پیغام د خپل اولس غوږونو ته ورسوی، او ورته ووایاست چی هوښیار اوسي او خپل د لستوڼی مار ته رایه ورنه کړی. د کرزي سره خپل ټول داړه ماران، قاچاقبران، جنګ سالاران، فاسد عناصر، د فهیم او دوستم او نورو ناروا دوستانو په میلیارډو ډالره ملګري دي. د هغه سره خپل والیان، اولسوالان، د پارلمان ډېر زیات وکیلان ، پوځ او پولیس ملګري دی. د هغه لپاره ټول مطبوعات، راډیوګاني، ټلوېزیونونه، مجلې او ورځپاڼی خپروني کوی. د کرزي له ډلي سره مبارزه کول څه اسانه کار نه دی ، خو امید باید له لاسه ورنه کړو او د هغه د بل ځل انتخابېدلو په نتیجه کی ټولو هغو خطرونو ته متوجه اوسو چی خدای ناخواسته هیواد، په تېره بیا پښتون اولس به ورسره مخامخ وی او بیا به یې هیڅ چاره نه کېږی.

وگر بینی که نا بینا و چاهست اگر خاموش بنشینی گناهست

 والسلام

 ستاسي خدمتګار           عبدالباري جهاني

د موضوع اړوند نوري ليکني

عبدالجبار فراز     زموږ استادانو ؛ د جهاني لاره تعقيب کړئ!

ثريا خادم :            باید نور ویښ شو