لراوبر ویب پاڼه لراوبر يو افغان – تازه خبرونه
د امريکا د دفاع وزارت وايي په افغانستان کي د مېشتو عسکرو دپاره يې د جولاى شپږمه نېټه په تېر يوه کال کي (د ٢٠٠٨ د جولاى تر ١٣ وروسته) تر ټولو مرګونې ورځ وه.
پنټاګان منلې چي په افغانستان کي يې د دوشنبې په ورځ اووه عسکر د طالب جنګياليو سره له جنګ له لاسه ورکړي دي.
په کابل کي د ايتلافي ځواکونو وياند برين نارنجو وايي د دوشنبې په ورځ د کندوز په ولايت کي هغه ماين د دوى پر عسکرو چاودلئ و چي له کبله يې څلور پوځيان وژل سوي وو.
بلي خواته نوموړي د سې شنبې په سهار رسنيو ته د درو امريکايي عسکرو وژل تائېد کړل، چي وايي د افغانستان په جنوب کي يې د لاسه ورکړي دي.
په جنوبي نا ارامه ولايت هلمند کي د پنجشنبې د ورځي راهيسي ٤٠٠٠ امريکايي او ٦٥٠ افغان پوځيانو د خنجنر په نامه عمليات پيل کړي چي وايي له طالبانو څخه يې د ناوې او ګرمسېر ولسوالۍ پاکي کړي دي.
که څه هم امريکايي پوځيان په دې عملياتو کي د پرمختګ ادعا کوي، خو داسي ښکاري چي دوى هم د طالبانو له سخت مقاومت سره مخ دي او مرګ ژوبلي يې ورته اړولي دي.
د طالبانو وياند قاري يوسف احمدي وايي جنګياليو د خنجر تر عملياتو وروسته خپل تاکتيک له جبهيي جګړې څخه چريکي بريدونو ته اړولى، چي په تېرو څو ورځو کي يې بهرنيو پوځيانو ته درنه مرګ ژوبله اړولې ده.