د فيل په غوږ کې بيده ولسمشر

د سه شنبې په ورځ د حامد کرزي وياند همايون حميدزاده څخه په مطبوعاتي کنفرانس کې په وار– وار د خبريالانو له خوا دا پوښتنه وشوه چې ولې افغان حکومت د کرکټ ملي لوبډلې د لوبغاړو سم هرکلى ونه کړ او دوى يې ونه لمانځل، نه هوايي ميدان ته ورغلل او نه يې بل څوك ورولېږل؟

حميدزاده په لومړيو کې وويل چې له دې موضوع نه دى خبر، بيا يې وويل ولسمشر يوه کميسيون ته دنده سپارلې وه، چې د دغو لوبغاړو هرکلى وکړي، بيا يې وويل دى  به له ولسمشر سره دا شکايتونه شريکوي. كه چېرې دا رښتيا هم دغسې وو، نو ولسمشر به يې پلټنه كوي.

خبريالانو له حميدزاده څخه همدا پوښتل، چې ولې ځينې لوبغاړي چې کله له نورو هېوادونو څخه راشي ګڼ جګپوړي دولتي چارواکي يې هرکلي ته ورځي، ولسمشر يې په شخصي توګه مرسته کوي او لمانځي يې، خو د کرکټ ملي لوبډله چې په کمو امکاناتو يې د نړۍ په كچه زياتې برياوې درلودې نه يې چا لمانځنه وکړه او نه يې ولسمشر کوم وخت نوم په خوله واخيست.

د ولسمشر په ګډون چې د فيل په غوږ کې بيده دى يا ځان دغسې ناګاره نيسي، نورو چارواکو هم په دې باب اقدام ونه کړ. ايا دې ټيم دا بريا يوه قوم او يوې ډلې ته راوړه که يې ټول افغانستان ته؟

ولسمشره!

هغه هېواد چې ته په کې اوسې په نړۍ کې د مخدره توکو د قاچاق مرکز ګڼل کېږي، د مرګ ژوبلې ډګر ګڼل کېږي خو ستا د هېواد رښتينو بچيانو ورته داسې وياړ راوړ چې تا به يې خوب هم نه و ليدلى، مګر نه يوازې چا دغه رښتيني اتلان ونه لمانځل بلکې چا ياد هم نه کړل. ولې؟

اوس چې د ولسمشرۍ لپاره د ګڼو كسانو له كمپاينونه روان دي، لږ تر لږه خو به دې د ځان د كمپاين لپاره هم د دوى لږ لاسنيوى كاوه، ځكه هسې خو هم په ملت كې محبوبيت نه لرې او ورځ په ورځ د خپل بېكاره كاري ټيم له كبله خپل حيثيت او محبوبيت له لاسه وركوې.

تاسې ګورئ چې ګڼ لوبغاړي چې د لوبو لپاره بهرنيو هېوادونو ته لاړل وتښتېدل او بيا يې د خپل هېواد نوم هم په خپله خوله وانخيست، تا ته به د کرکټ ملي لوبډلې د وفادارۍ پته لګېدلې وي، چې په تش نس او کمو امکاناتو يې لوبې وکړې، نه يوازې ونه تښتېدل بلکې له وياړونو سره دغه خوار او ځپل شوي هېواد ته راغلل.

د افغانستان د کرکيټ ملي لوبډله کابل ته ورسېده