لراوبر ویب پاڼه لراوبر يو افغان – تازه خبرونه
په اتریش کی د افغانانو د انتګراسیون او کلتور ټولنی عمومی غونډه د یکشنبی د مارچ په اوومه د ویانا د ښار د نهمی ناحیی د جشنونو په صالون کی د یو زیات شمیر میشتو افغانانو په ګډون جوړه شوه. غونډه د کلام الله د مبارک آیتونو په قرائت سره شروع او ورپسی د ټولنی مشر دوکتور مالیار د ټولنی د فعالیتونو مفصل راپور غونډی ته وړاندی کړ.
په غونډی کی د ټولنی د مشرتابه یو شمیر نوي غړي او د څانګو ځینی مسئولین د رایو په اکثریت انتخاب شول. په اتریش کی د افغانانو د انتګراسیون او کلتور ټولنه (ګیکا) په غونډی کی د رحمن بابا مزار ته سپکاوۍ او د پښتو د دی سترعارف قبر په بمونو الوزول یو لوی جنایت او ناځوانمردانه عمل او په کلکه وغندل شو د ګیکا ټولنه د پښتونخوا د امنیتی چارواکو څخه غوښتنه کوي چی د دی نه بښونکی جنایت عاملین ژر تر ژره پیدا او د قانون منګلو ته وسپاري .
په غونډی کی همدارنګه د ټولنی د نوي ویب پاڼی ( افغان کور) د محتویاتو په باره کی د غونډی د ګډونکونکولخوا بحث وشو، د افغان کور ویب پاڼه به په نژدی راتلونکی کی د ګیکا د ټولنی رسمي ویب پاڼی په توګه په خپلو خپرونو پیل او په اتریش کی د افغانانو د ژوند د مختلفو فرهنګی اجتماعی او ادبی فعالیتونه به هغه کی انعکاس ورکړ شي.
په اتریش کی د افغانانو د انتګراسیون او کلتوری ټولنه (ګیکا) عمومی غونډه چی د ماسپښین په دوه و بجو شروع شوی وو د مازیګر په شپږو بجو پای ته ورسید.
د ګیکا (GIKA) د نشراتو څانګه
A-1210 Wien, Mühlweg 4 Tel.: 069913171305 e-mail: a.malyar@gmx.at
