لراوبر ویب پاڼه لراوبر يو افغان – تازه خبرونه
د ارادې خپلواکې ورځپاڼې د خپل لومړي مخ په غټ سرلیک کې په پاکستان کې د طالبانو د دریو ډلو ترمنځ د نوي ائیتلاف خبر ورکړې چې په افغانستان کې د جنګ لپاره منسجم کیږي.
ورځپاڼې د موضوع په دوام لیکلي دي چې دا نوې جبهه د ملا عمر د وروستۍ غوښتنې پر بنسټ شوې ده.
ورځپاڼې په افغانستان کې روان حالات هم څیړلي او لیکلي دي چې د یوې شفافې ستراتیژۍ پرته دا ستونزې نه هواریږي.
ورځپاڼې پخپله سرمقاله کې په کابل کې د برښنا په اړتیا تبصره کړې او لیکلي دي چې د برښنا د بهیر د بندیدو د مخنیوي لپاره باید ټول دولتي ،نا دولتي ادارې، موسیسې او خلک د برښنا بلونه پخپل وخت ورکړي.
د هیواد دولتي ورځپاڼې د خپل لومړي مخ په سر کې د ولس مشر کرزي په مشرۍ د سلاکارو وزیرانو د غونډې خبر ورکړې او د ښاغلي کرزي په حواله يې لیکلي دي چې د ولس مشر په توګه به دا اجازه ورنکړي چې د نظام مشروعیت تر پوښتنې لاندې راشي.
ورځپاڼې پخپله سرمقاله کې بیا هم د راتلونکو انتخاباتو په اړه وروستې پرمختګ څیړلې او د اساسي قانون په پلي کولو يې ټینګار کړې دې.
د افغانستان نا دولتي ورځپاڼې بیا هم د ولس مشر کرزي د فرمان په اړه د ملې متحدې شورا غبرګون راغستې او ددغه سیاسي بهیر په حواله يې لیکلي دي چې د ولس مشر کرزي دا فرمان عملي اړخ نلري.
ورځپاڼې په عینې حال کې د برطانیې د شاهي دولت په نقل لیکلي دي چې د زمري په میاشت کې د انتخاباتو له ترسره کولو نه ملاتړ کوي.
ورځپاڼې په افغانستان کې شته ستونزې او د حکومت د محبوبیت په اړه هم یو څیړنیز مطلب خپور کړې او لیکلي دي چې حکومت خپل محبوبیت له لاسه ورکړې دې.
د ویسا خپلواکې ورځپاڼې بیا د انتخاباتو په اړه پورته شویو لانجو ته په اشارې لیکلي دي چې د انتخاباتو د نیټې لپاره سیاسي مصلحت ته اړتیا ده.
ورخپاڼې په یو جلا مطلب کې د فرانسې د دفاع د وزیر په حواله لیکلي دي چې ناټو باید له افغانستان څخه د ځواکونو د ویستلو لپاره یوه نیټه وټاکي.
ورځپاڼې د افغانستان په اړه د امریکا د ستراتیژۍ په اړه هم یو مطلب خپور کړې او لیکلي دي چې ددې ستراتیژۍ بدلون به څه بدل کړي.
د افغانستان ټایمز انګلسي ژبې خپلواکې ورځپاڼې بیا پخپله سرمقاله کې په هیواد کې د کوکنارو د له منځه وړلو لپاره روانې هڅې څیړلي او لیکلي دي چې پدې برخه کې هره هڅه باید وستایلې شي.
دې ورځپاڼې هم په پاکستان کې د طالبانو د نوي ائیتلاف مسله راغستې او لیکلي دي چې دا ائیتلاف د افغانستان په اړه د اوباما ستراتیژۍ له ګواښ سره مخامخ کوي.
د اصلاح او انیس دولتي ورخبانو هم د افغانستان او سیمې روان حالات څیړلي او بیلابیل مطالب يې پرې خپاره کړیدي.
انیس پخپله سرمقاله کې بیا پدې مسلې تبصره کړې که چیرې ولس مشر د انتخاباتو نیټه ځنډولې وې نو نورې ستونزې به ځیږیدلې واې.
خو اصلاح بیا د فساد د له منځه وړلو لپاره روانو هڅو ته په اشارې پدې برخه کې د روانې مبارزې په بیاکتنې ټینګار کړې دې.
د هشت صبح نا دولتي ورځپاڼې هم د انتخاباتو په اړه روانو تودو بحثونو ته په اشارې لیکلي دي چې د هیواد اساسي قانون د سیاسي مشرانو د لوبې په اله بدل شوې دې.
ورځپاڼې پخپله سرمقاله کې هم همدې مسلې تبصره کړې او لیکلي دي چې په قانون لوبې کول د خلکو سپکاوې دې.
ورخپاڼې به یو جلا مطلب کې بیا دا خبر ورکړې دې چې په هیواد کې د ښاروالیو انتخابات به په ۱۳۸۹ لمریز کال کې ترسره شي.