لراوبر ویب پاڼه لراوبر يو افغان – تازه خبرونه
له جمهوري رياست څخه يوې باوري سرچينې لر او بر ويبپاڼي ته وويل چي د ولسمشر كرزي له خوا كندهار نوى والي وټاكل سو.
ډاكټر توريالى ويسا چي نيژدې دوې لسيزي يې په امريكا د مهاجرت ژوند كاوه، د كمونستانو په حكومت د كندهار پوهنتون تر تاسيس وروسته د دغه پوهنتون لومړنى رئيس و، چي د سرچيني په وينا ډېر ژر به د كندهار د والي په توګه كار پيل كړي.
كندهار چي تر كابل وروسته د افغانستان دوهم لوى ښار دئ، په دې وروستيو دوو كلونو كي ورځ تر بلي پكښي امنيتي حالت خرابېږي او پر ولايتي اداره يې په نړيواله كچه د فساد تورونه لګول كېږي.
ښاغلى ويسا په داسي حال كي د جنرال رحمت الله روفي پر ځاى د كندهار والي ټاكل كېږي، چي پخوانى والي روفي تر درې نيم مياشتني كار وروسته په ناڅاپي ډول د ولسمشر كرزي له خوا ليري كړل سو.
پخواني والي رحمت الله روفي وويل چي دى د كندهار د ولايتي شورا له رئيس او د ولسمشر حامد كرزي د ورور احمدولي خان کرزي سره د مخالفت پر اساس له خپلي دندي څخه ګوښه او کابل ته ور وغوښتل سو.
د کندهار ښار يو شمېر لیکوالانو، ادیبانو، پوهانو او د اند و قلم خاوندانو د یوې خبري ناستي له لاري د جنرال روفي ننګه او ملاتړ وکړ او د يوه پرېکړه ليک په ترڅ کي يې د کابل پر لوړپوړو مقاماتو په ګډه ږغ وکړ، چي د روفي د ګوښه کېدو لامل په ډاګه كړي او د کندهار دپاره دي والي د يوه تن په خوښه نه، بلکي د ټول ولس په خوښه انتخاب کړل سي، کنې د کندهار ولس به په راتلونکو ټولټاکنو کي خپل بای کاټ اعلان کړي.