لراوبر ویب پاڼه لراوبر يو افغان – تازه خبرونه
فرانس پریس آژانس په خپل تازه خبر کی وایی چی پاکستان الاصل برتانوی القاعده وال راشد رؤف چی ویل کېده څلور ورځی مخکی په شمالی وزیرستان کی د امریکایی بې پیلوټه طیارو په حمله کی وژل سوی و ، ژوندی دی . د راشد رؤف مدافع وکیل حشمت علی حبیب بی بی سی ته وویل چی « موږ باوری نه یو چی دا قصه دې رښتیا وی . . . دا یوه ساختګی کیسه ده . موږ اوس هم په دې باور یو چی زما مؤکل مړ نه بلکی ژوندی دی . » ده وویل چی د هغه د جسد غوښتلو ته مثبت ځواب نه دی ورکول سوی . ده زیاته کړه چی « دا د حکومت یو نوی تخنیک دی چی ځان د راشد او نورو لادرکو خلکو د قضیو څخه خلاصوی . » رؤف د لندن د هوایی ډګر د حملې په ارتباط په ۲۰۰۶ کی په پاکستان کی نیول سوی و چی د ادعا له مخی یې د هغه ګروپ سره تړاو درلود چی غوښتل یې د لندن څخه امریکا ته څو تلونکي طیارې په هوا کی وچاودوی . خو یو کال وروسته د پولیسو له بنده تښتېدلی و . د برتانیې خارجه وزارت وایی چی موږ د هغه د وژل کېدو په هکله دقیق معلومات نه لرو . داسی ښکاری چی دا اوس یوه معما ګرځېدلې ده .