نيمګړی څلی 

 د شعرد اورېدلو دپاره دلته کليک وکړئ 

پښتون زلمی افغان یمه خپل حق مې پیژندلی
په ټينګ عزم اپمان

وطن ځنې قربان يمه ما سر په لاس نيولی
نن بيا دی امتحان

وطنه ستا لپاره زه يم تير له مال او سره
دا لاره د پښتون ده

که سل ځله مړ کيږم غلامۍ نه ده بهتره
دا غوره له ژوندون ده

يووالي اتفاق نه بله لاره نشته غوره
ليلا د خپل مجنون ده

وطن زمونږ ناموس دی په ناموس مې مرګ منلی
همدا زما اعلان

اتل که د جګړې ومه پرونه نن د قلم يم
دا نښه د غیرت ده

به لاس مې کتابونه پوهنځي په لاره سم يم
ښه زده کړه مې همت ده

غليم مې پيژندلی دی په عزم مصمم يم
دا لارزمونږ د پت ده

زما د ننګ تاريخ دی ټول جهان ژور لوستلی
مالوم يم په جهان

زه لويه آريانا وم خراسان شومه افغان يم
د لمر غوندې ځليږم

صفت مې خپلواکي ده دې صفت سره عيان يم
په دې پيژندل کيږم

جګړې ته که اړ نه شمه د سولې نګهبان يم
زه تل په دې نازيږم

که چا جګړې ته اړ کړمه بیا نه يم شاته تللی
ګټلی مې ميدان

دښمن دې په دې پوه شي خپل غوږونه دي کړي خلاص
که نن وي يا سبا وي

د لوی احمد وطن به جوړومه په اخلاص
خبره دې دنیا وي

پښتون به بيا جرګه شي د يووالي په وسواس
بچی که د بابا وي

اخر به خدمتګار کړی مکمل نیمګړی څلی
په ننګ د لوی افغان

نمیګړی څلی = نيمګړې آزادي