لراوبر ویب پاڼه لراوبر يو افغان – تازه خبرونه
افغان هغه دی چې د لوی وطن یووالی غواړی
چې د نفاق په لارو ځي هغه دښمن دی زمونږ
زه د وطن له خاورو جوړ یمه غیرت غیرت یم
بې همتي په ژوندانه باندې منلی نه شم
وطن مې مور ده مور روزلی يمه پت خمت يم
زه د وطن دښمن ته کله ټيټيدلی نه شم
پرون د تورې پالوان نن د ملي وحدت يم
د پلار وطن تقسيميدل مې قبلولی نه شم
روح مې په تن دی اسوده ملي يووالی غواړي
څوک چې په ژوند قوم خرڅوي هغه دښمن دی زمونږ
پلار مې نيکه غوندې اتل ؤ چې غلام نه شولو
دوی د غيرت سرو سنګرو کې تل ژوندي پاتې شول
خپلو حقوقو له غوښتلو نه ارام نه شولو
ځکه سرلوړي لوړو غرو کې تل ژوندي پاتې شول
په هيڅ حالت کې خپل دښمن ته په سلام نه شولو
ځکه خوشحاله وينه سرو کې تل ژوندي پاتې شول
اوس ارواحګانې د هغوی ملي شته والی غواړي
څوک چې ولس خپل بيلوی هغه دښمن دی زمونږ
زه به د پلار نيکه له وينو ګلستان جوړ کړم
اوس مې سنګر دی ټينګ نيولی د کمال او پوهې
په ځای د تورې به قلم کاغذ نشان جوړ کړم
ما پيژندلې ده ښکلا جمال کمال د پوهې
په علم پوهه به دا وران وطن ودان جوړ کړم
ما حاصل کړی دی وصال حسن کمال د پوهې
د پلار رښتيني زامن هسې رنګ جوړوالی غواړي
چې موله پوهې ستنوي هغه دښمن دی زمونږ
څوک چې د ملک خدمت کوي نو ښونځی جوړوي
چې ورانول کوي نوکر د دښمنانو دی دا
څوک چې وطن ابادوي نو پوهنځی جوړوي
چې سوځول کوي نوکر د دښمنانو دی دا
چې ولسونه يو کوي جرګې ملي جوړوي
چې بيلول کوي نوکرد د ښمنانو دی دا
چې خدمتګار ورله مخ تور او رسوا والی غواړي
چې ورور په ورونو قتلوي هغه دښمن دی زمونږ
