لراوبر ویب پاڼه لراوبر يو افغان – تازه خبرونه
د نړيوالۍ ټولني په مالي او ځاني ملاتړ سره له اوو کلونو لګښتونو او هڅو وروسته حکومت په دې ايله وتوانېده ، چې د هېواد د خپلواکۍ جشن ، چې د ټول ملت د وياړ او سرښندنې پايله ده له ازادې فضا( غازي لوبغالي ) څخه کومې کوټې ( ارګ ، اماني لېسې او يا استقلال لېسې ته را ولېږدوي .
ددې پرځاى چي د جشن سيمه نوره هم پراخه شي له بده مرغه د جشن چمن او لوبغالى د امنيتي ملحوظاتو له امله په کوټې بدليږي او د يوې عادي غونډي بڼه غوره کوي .
اوس پوښتنه دلته ده ، چي په ارګ ، اماني لېسې او يا په استقلال لېسې کښي به د ټانکونو، درنو اوسپکو وسلو، بېلابېلو موټرو او د لسګونو زرو پوځونو نمايش څنګه ترسره شي او که دا ونه شي ، نو د جشن مانا څه شوه او عام وګړي به څه ډول ددې جشن ننداره وکړي ؟
ډيره د افسوس خبره ده، چي د هېواد د خپلواکۍ جشن په کومه کوټه کښي نمانځل کيږي هغه هم دداسي هېواد، چي تل يي د خپلواکۍ د ترلاسه کولو په موخه د سرونو په بيه دا هېواد ساتلى ، ګټلى او له پرديو څخه پاک ساتلى ، خو اوس داسي حالت ته رسېدلى ، چي د نمانځلو ورځ يي دکوټې بنديوانه کيږى .
دغه ډول پرېکړه وروسته له هغه وشوه ، چي کله د مجاهدينو د ١٦ کليزي د برياليتوب په ورځ (د غويي په ٨ مي ) د کابل ښـار غازي لوبغالي ته څېرمه د جشن پر مراسمو له پنځه سوه مترۍ څخه د وسلوالو طالبانو له خوا بريد وشو ، چي د ولسي جرګې د يوه غړي په ګډون پنځه تنه په کښي ووژل شول او لس نور ټپيان شول .
هغه مهال ټولي نړۍ په ژوندۍ بڼه وليدل، چي د افغانستان د حکومت او نړيوالي ټولني قوت څومره په دې هېواد کښي د ډاډ وړ دى .
له دې اعلان سره چي سږکال به د هېواد د ٨٩ مي د خپلواکۍ د کليزي جشن په کوم تالار کښي ترسره شي ، عام ولس ته يو ډول ذهني نا ارمتيا پيدا شوي او داسي انګري ، چي نور هېواد خو پرېږده ، چي دوى له دومره امنيتي تدابيرو سره سره په پلازمېنه کابل کښي هم خوندي نه دي ، چي د خپل هېواد دخپلواکۍ مراسم په ازداه فضا کښي تر سره او هغه وويني ، چي دې اعلان زياتر خلک د حکومت په حاکميت شکمن کړي دي .
د حکومت يوه چارواکي په يوه خبري کنفرانس کښي دومره غټ دورغ وويل ، چي له ځان څخه يې څو چنده غوښن او زيات وو، دغه چارواکي خبريالانو ته وويل چي دغه جشن ځکه د يادو شويو ځايونو په کوم تالار کښي ترسره کوي ، چي د غازي لوبغالي د رغوني کار پيل شوى دى او نه شي کولاى چي تېر په څېر هلته ترسره شي ، خو که تاسو لوستونکي غازي لوبغالي ته لاړ شئ ، نو هلته د هيڅ کار د پيل څرک به ونه وينئ او دغه لوبغالى په خپل حال ده .
خو اصلي خبره داده ، چي اوس حکومت په دې باور دى ، چي که په کومه کوټه کښي ددې جشن مراسم ترسره شي ، نو بيابه هغه ډول وېرونکې پېښـه نه رامنځته کيږي او په دې کښي به د حکومت پرده پرځاى وي ، خو ملت چي هر څه وايي هغه پروا نلري ، چي نړيوال څه ونه وايي .
خو د حکومت واکدارانو ! دا جشن ستاسو نه ، بلکي د ملت دى او ملت ته تاسو داسي ډاډمنه فضا برابره کړئ ، چي دغه له وياړونو ډکه ورځ د هېواد په ټولو لويوښارونو، ولايتونو او ولسواليو کښي په خورا خوښۍ سره ونمانځي، خو له هغوى څخه دغه د خوښۍ ورځ په کوټه مه ننباسئ ، چي بله ورځ به بيا په کوټه کښي هم د نمانځلو چانس درته نه وي .
