لراوبر ویب پاڼه لراوبر يو افغان – تازه خبرونه
د امريکا دوه لوړ پوړي چارواکي په ناڅاپي سفر په جلا جلا توګه کابل ته راورسېدل او دلته ئې د افغان چارواکو سره وکتل.
د امريکا د دفاع وزير مارک اسپر په يو ناڅاپي سفر کابل ته راورسېدی، ددې سره هممهاله د امريکا د کانګرس مشره نانسي پلوسي هم چي په اردن کي وه کابل ته راغله.
مارک اسپر د ولسمشر غني سره د سولي د خبرو د بيا پيلېدو او د افغان امنيتي ځواکونو سره د همکارۍ په تړاو وږغېدی او همداراز ئې د افغان ولسمشريزو ټاکنو په تړاو د افغانانو هڅي وستايلې.
بل خوا د کانګرس مشري نانسي پلوسي هم د ولمسشر غني، اجرائيه رئيس ډاکټر عبدالله او نورو افغان چارواکو سره وکتل.
له ارګ څخه خپره سوې خبرپاڼه کي د پلوسي د خولې ويل سوي: “په افغانستان کي زموږ د حضور دلیل دا دی چي یو وخت طالبان په دغه هیواد کي د هغو تروریستانو کوربه وو چي پر موږ يې برید وکړ او موږ هیڅکله نه غواړو چي افغانستان دوباره د تروریستانو پر ځاله بدل سي.”
د خبرپاڼې له مخې، نوموړې په افغانستان کي د ښځو لاسته راوړنې وستایلې او ویې ویل، د امریکا متحده ایالتونو په کانګرس کي زموږ لپاره یو لومړیتوب د افغان ښځو د حقونو تامین او د لاسته راوړنو ساتنه ده.
دا پر داسي مهال ده چي په دې وروستيو کي د امريکا او طالبانو ترمنځ د سولي د خبرو د بيا پيلېدو اوازې ګرمي سوي دی.