لراوبر ویب پاڼه لراوبر يو افغان – تازه خبرونه
د امريکا د بهرنيو چارو وزير مايک پومپيو ويلي، چي د افغان سولي په پروسه کي به افغان دولت مرکزي رول ولري.
نوموړي چي د امريکا د سنا مجلس د تخصصې بوديجې په کمېټه کي د سناتورانو پوښتنو ته ځوابونه ورکول وويل، چي افغان حکومت به د سولي په هر تړون کي مرکزي رول ولري.
نوموړي د امريکا د سنا مجلس د يو غړي ليندسي ګراهام د دې پوښتي په ځواب کي چي “افغان حکومت به د سولې په هر تړون کي هدفمند حضور ولري؟” وويل:
“تر دې زیات، هغوی (افغان حکومت) به په مرکزيرول کې وي. دا به د افغانانو په مشرۍ یو بهیر وي.”
دا پر داسي مهال ده چي طالبانو د امريکايي استازو سره پنځه ځلي مخامخ خبري اتري کړي دي، چي وروستۍ ليدنو کتنو تقريبا دوې اوونۍ دوام درلود.
طالبانو د افغان حکومت سره د مخامخ ليدني څخه انکار کړی دی.
د امريکا د سنا مجلس پر حکومت ږغ کړی دی چي د طالبانو سره د خبرو اترو په هکله دي دوی ته مالومات ورکړی.
د سناتورانو په خبره، د امريکا د بهرنۍ پاليسي له مخي بايد په داسي مهمو مسائلو کي د سنا مجلس ته مالومات ورکړل سي.
امريکايي چارواکي وايي، چي د طالبانو سره ئې په خبرو کي پرمختګ کړی دی، خو تراوسه ئې کوم تړون ورسره نه دی کړی.