لراوبر ویب پاڼه لراوبر يو افغان – تازه خبرونه
طالب وياند ذبيح الله مجاهد وايي، په ښارونو کي د ځانمرګو بريدونو په هکله به دقت کوي.
نوموړي دا خبري د نيويارک ټايمز د هغه راپور په ځواب کي کړې دي چي ګڼي طالب وياند ويلي چي نور به دوی په ښارونو کي ځانمرګي بريدونه نه کوي.
ذبيح الله مجاهد رسنيو ته په استول سوې يوې خبرپاڼه کي ويلي دي چي دده له خبرو ناسم تعبير اخيستل سوی دی.
نيويارک ټايمز ورځپاڼې پرون د چهارشنبې په ورځ يو راپور خپورکړ چي پکي ويل سوي وه، طالبانو پس له ډېرو کلونو د لومړي ځل لپاره په ګڼ ميشتو ځايونو کي د ځانمرګو بريدونو د نه کولو په هکله خبر ورکړی دی.
خو د طالبانو وياند ذبيح الله مجاهد د نيويارک ټايمز ددغه راپور په غبرګون کي يوه خبرپاڼه رسنيو ته لېږلې ده چي پکي ويل سوي دي: د نیویارک ټایمز خبریال پوښتنه وکړه چي ولي له اختر څخه را وروسته په کابل یا بل کوم ښار کي مجاهدینو لوی فدايي بریدونه نه دي کړي.
“ځواب ورکړل سو، چي په ښارونو کي عملیات زمانگیره وي، مجاهدین خورا احتیاط کوي او هڅه کوي چي اهداف په ډير دقت سره په نښه سي، ترڅو له عملیاتو سره ملکي خلکو ته زیان ونه رسېږي؛ نو ځکه په ښارونو کي د عملیاتو اجرا څه وخت ته ضرورت لري او په تلوار سره نه سي ترسره کیدلی، چي ان شاءالله د اهدافو په تشخیص کیدو سره به داسې عملیات ترسره سي”.
طالب وياند ويلي له پورته ځواب څخه د نیویارک ټايمز خبریالانو ناسم تعبیر اخیستی دی او یا يې ښايي قصدا د خبرو د تحریف هڅه کړې وي.
نيويارک ټايمز په خپل راپور کي ويلي وه چي ذبيح الله مجاهد له نامالومه ځايه په ټيليفون کي ورځپاڼې ته دغه خبره کړې ده چي وسله والو ته په هغه ځايونو کي چي عام وګړي وي د ځانمرګو بريدونو د نه کولو ويل سوي دي.