لراوبر ویب پاڼه لراوبر يو افغان – تازه خبرونه
په فراه ولايت مرکز کي لا هم د طالبانو او دولتي ځواکونو ترمنځ درنه جګړه روانه ده.
سيمي ته امريکايي هوايي ځواکونه رسېدلي او د A-10 جنګي الوتکي په سيمه کي ګرځي او طالب وسلوال په نښه کوي.
نن سهار يوه بجه طالبانو د فراه ولايت پر مرکز له څو لوريو بريدونه پيل کړه چي د ورځي په جريان کي د دولت او وسلوالو ترمنځ جګړې زور واخيست او ځيني حکومتي تاسيسات د طالبانو ترکنټرول لاندي راغله.
افغان حکومت وايي سيمه کي ددوی کنټرول دی او ولسي خلګ د دولتي ځواکونو ملاتړ کوي او طالبان يې په ځينو ساحو کي محاصره کړي او ځيني شاتګ ته مجبور سوي دي. خو د سيمي خلګ وايي ښار ته طالبان ننوتلي دي او د ملي امنيت رياست د طالبانو لاس ته لوېدلی دی.
افغان چارواکي وايي، سيمي ته تازه دمه کمانډويي ځواکونه رسېدلي او طالبان يې پر شا کړي دي.
د فراه والي عبدالبصیر سالنګی تایید کړې ده چي وسله وال طالبان د فراه ولایت د مرکز اړوند سیمو ته ننوتلي او د ښار په زړه کي یې له افغان امنیتي ځواکونو سره جګړه روانه ده.
د هغه په خبره، د مرکز مهمې دولتي ودانۍ د افغان ځواکونو په ولکه کي دي.
دولتي چارواکي تاييدوي چي افغان سرتېرو ته مرګژوبله اوښتې ده خو وايي طالبانو ته يې هم درته مرګژوبله اړولې ده.
بل خوا د طالبانو وياند ذبيح الله مجاهد رسنيو ته په لېږل سوې خبرپاڼه کي ويلي چي د فراه مرکز ډېری سيمي دوی نيولي او لا هم د پرمختګ په حال کي دي.
نن سهار ولسمشر اشرف غني د ملي دفاع وزارت ته تللی وو او هلته يې د فراه د جګړې په هکله نظامي چارواکو ته لارښووني وکړې.
څه موده وړاندي د فراه چارواکو ويلي وو چي که مرکزي دولت ياد ولايت ته پاملرنه ونه کړي د سقوط سره به مخ سي.