لراوبر ویب پاڼه لراوبر يو افغان – تازه خبرونه
د افغانستان اجرائيه رئيس ډاکټر عبدالله عبدالله تېره ورځ د عقرب د مياشتي پر ۲ نېټه کندهار ته په رسمي سفر راغلی وو.
د ښاغلي عبدالله د راتګ هدف په کندهار کي د لمريزي برېښنا د يوې پروژې پرانستل وو، دا پروژه به د کندهار ښار په ختيځ کي د لمريزي برېښنا يو سيسټم فعاله کوي، د ياد سيسټم د فعاله کولو چاري د يوې هندۍ کمپنۍ پرغاړه دي او لکښت ئې ۲۰ مليونه ډالره دی.
ددغه سټېشن په فعاله کولو سره به کندهار د ۱۰ ميګاواټه برېښنا څخه برخمن سي، چي ډېره برخه ئې کېدای سي د کندهار صنعتي پارک ته ورکړل سي.
ډاکټر عبدالله وويل ددې پروژې په تکميلېدو به د کندهار د فابريکو د برېښنا ستونزه حل سي.
د کندهار په صنعتي پارک کي د برېښنا د دوامداره نه شتون له امله ډيري کارخاني تړل سوي دي او په دې برخه کي پانګه اچونه ټکنۍ سوې ده. د صنعتکارانو په خبره که د برېښنا ستونزه حل سي زيات هيوادوال به په صنعتي پارک کي پانګونه وکړي او د يادو کارخانو په فعاله کېدو به تر ډېره د بهرنيو هيوادونو د خوراکي، څيښاک او نورو استعمالي توکو مخه ونيول سي او پر ځای به ئې په کور دننه کي توليدسوي توکي د خلګو اړتيا ورپوره کړي.