لراوبر ویب پاڼه لراوبر يو افغان – تازه خبرونه
د پوستې څخه تر لوړ پوړو امنیتي مسؤلین به د خپل چلند په اړه ولسونو ته ځوابونه ووایي .
د میدان وردګو ولایت نظامی شورا چې د دغه ولایت د والي ښاغلي حیات الله حیات په مشرۍ جوړه شوې وه،پرېکړه وکړه،چې د هرې ولسوالۍ د پوستې څخه تر لوړ پوړي امنیتي مسؤل پورې به د دوی د چلند په اړه د اړونده ولسوالۍ اوسیدونکو ته ځوابونه ورکړي .
ښاغلي حیات وویل ګڼ شمېر ولسونو ورسره د لیدنې په ترڅ کې د یو شمېر امنیتي منسوبینو د چلند په اړه نیوکې کړي،چې د دغه ستونزو د حل په موخه به د راتلوونکې اونۍ په ترڅ کې ولسونو ته د امنیتي ځواکونو د ځواب ورکونې لړۍ پیل کړي .
هغه زیاته کړه،په ولسوالیو او مرکز کې به د اړونده سیمو اوسیدونکو ته د پوستې څخه تر لوړ پوړي امنیتي مسؤل پورې حاضر کړي او هغه نیوکې چې لري د دوی پر وړاندې به یې له اړونده منسوبینو سره مطرح کړي،چې د هغوی له لورې به ورته ځوابونه وکړل شي.
نوموړی وايي د ولسوالیو په کچه دغه امنیتي منسوبین به د نظامي شورا د غړو سربېره د ولایتي شورا غړو او د اړونده ولسوالیو د بېلابېلو قریو د مخور په وړاندې د خپل چلند په اړه ځوابونه ووایي .
د میدان وردګو والي وایي له دغه کار څخه یې موخه د ولسونو او حکومت ترمنځ اړېکې غښتلي کول دي،چې په ترڅ کې به دوی د خپل حکومت او په ځآنګړې ډول له امنیتي ځواکونو سره هم همکار شي .
دا په داسې حال کې ده،چې په دې وروستیو کې د سیداباد،چک او نرخ ولسوالیو په یو شمېر سیمو کې د امنیتي ځواکونو د چلند په اړه ولسونو د میدان وردګو والي سره خپلې اندېښنې شریکې کړې وې .