لراوبر ویب پاڼه لراوبر يو افغان – تازه خبرونه
د معارف رياست د پوهنيز بهير د کيفيت لوړولو او اصلاح په موخه خپلواکه او رضاکارانه مشورتي جرګه ګۍ جوړه سوه.
دا يوولس کسيزه جرګه ګۍ د کندهار والي په نوښت جوړه سوه چي نن ماځيګر يې دوهمه غونډه په ولايت مقام کي وسوه. د پوهنتون استادان او د رسنيو و مدني فعالانو استازي په دې جرګه ګۍ کي غړيتوب لري.
دغه رضاکارانه او خپلواکه جرګه ګۍ به د پوهني رياست چاري څاري او د هغو ستونزو لپاره به چي په دغه رياست کي موجودي دي، حللاري لټوي. جرګه ګۍ د خپلو صلاحيتونو او مسووليتونو لپاره خاصه لايحه جوړه کړې او په هرو ۱۵ ورځو کي به يو ځلي غونډه کوي.
د کندهار والي ډاکټر همايون عزيزي د جرګه ګۍ له غړو څخه مننه وکړه چي د معارف رياست د چارو د سمون او ظرفيت د لوړولو لپاره بېله کوم امتيازه کار کوي. نوموړي له دوی سره ژمنه وکړه چي تر وسه به د دوی مشورو ته غوږ نيسي او مثبت ځواب به ورته وايي.
ښاغلي عزيزي د پوهني رئيس ته سپارښته وکړه چي د دې جرګه ګۍ له غړو سره همکار پاته سي او په ګډه د هغو خنډونو مخه ونيسي چي دامهال معارف رياست ورسره لاس و ګرېوان دی. هغه زياته کړه چي د دې جرګه ګۍ او د خلکو په مرسته به په پوهني رياست کي د لاسوهنو مخه هم ډب کړي.
کندهاروالي د پوهني رئيس ته جدي لارښوونه وکړه چي له قانوني مراجعو پرته د هيچا پروا ونه ساتي او هغه کسان چي په دغه برخه کي ستونزي جوړوي، ولايت مقام ته په ګوته کړي. کندهار والي همداراز وويل د جرګه ګۍ غړي کولای سي چي د پوهني رياست دننه او د ښار په ښوونځيو کي هغه کسان چي علمي کچه يې ټيټه وي پوهني رياست ته په نښه کړي، څو رياست يې په اړه لازم اقدامات وکړي.