لراوبر ویب پاڼه لراوبر يو افغان – تازه خبرونه
دېر ژر دې په ۱۹ بیلا بیلو ادارو کې ۴۱۳ خالي بستونه د ازادې سیالۍ له لارې په وړ او په کار پوه کسانو ډک او دغه تشکیلاتي خلا دې پوره کړی شي.
د لغمان والي عبدالجبار نعیمي له لوري د یوې اونۍ په ترڅ کې د دې ولایت د هر اړخیزې ارزونې وروسته یوه هم په ۱۹ بیلا بیلو ادارو کې د ۴۱۳ خالي بستونو د شتون ستونزه وه چې په دې برخه کې یې د اصلاحاتو او ملکي خدمتونو او د اړونده ادارو مسولینو ته دنده ورکړه تر څو پرته له کوم فشار په پوره دقت او امانتدارۍ سره وړ او په کار پوه کسان د ازادې سیالۍ له لارې په دغو بستونو کې په دندو وګماري او دغه ستره تشکیلاتي خلا دې ژر تر ژره پوره کړي.
ښاغلي نعیمي زیاه کړه چې په ادارو کې د تشکیلاتو د پوره والي له مخې به مو د یوې خوا نه هغو خلکو ته چې د کار وړتیا لري او اوسمهال بې کاره دي، د کار زمینه برابره کړې وي او له بلې خوا به مو ولس ته په خدماتو کې ګړندیتوب رامنځته کړی وي.
همدارنګه د لغمان والي د اصلاحاتو او ملکي خدمتونو او د اړونده ادارو مسولینو ته د خپلې وینا په ترڅ کې د دې سپارښتنه هم وکړه چې د دغو خالي بستونو په ډکولو کې دې څلویښت سلنه د جندر موضوع رعایت او هغه ښځینه چې کاري وړتیا لري او غواړي په دولتي ادارو کې کار وکړي د هغوی لپاره دې لازمې اسانتیاوې برابرې شي.