لراوبر ویب پاڼه لراوبر يو افغان – تازه خبرونه
د میدان وردګو ولایت د بېلابېلو ادارو له لورې په ۱۳۹۴ هـ کال کې د پلي کېدو په موخه د 4,3 څلور اعشاریه درې میلیارده افغانیو په لګښت ۳۳۴ پروژې پلان شوي دي .
دغه پروژې چې ۲۷ یې د حکومتدارۍ،د قانون ټینګښت او بشرحقونو،۱۴ یې د دفاع او امنیت،۵۲ یې د پوهنې،فرهنګ،رسنیو او سپورټ،۴۰ د روغتیا او تغدیې،۱۰۵ د کرنې او کلیو پراختیا،۵۹ د طبیعي زیرمو او سرچینو،۱۱ د اقتصادي ودې او خصوصي سکتور پرمختیا او ۲۶ نورې د ټولنیز خوندیتوب سکتور لخوا پلان شوي دي .
د یادو پروژو د ښه پلي کولو په موخه د ولایت مقام له لورې د ۱۳۹۴ هـ کال پرمختیایي پلان چاپ شو.
دغه پلان چې زر ټوکه چاپ شوی،هر یوې د لومړیو پاڼو سربیره ۳۸ مخونه لري،چې په کې د بېلابېلو سکتورونو پلان شوې پروژې ځای پر ځای شوي دي.
د میدان وردګو سرپرست والي ښاغلي عبدالمجید خوږیاني د دغه پلان د جوړېدو له امله د سیمه ییزو ،پرمختیایي،معلولینو او د ښځو شوراګانو، سکتوري ادارو او ولسوالانو د هڅو ستاینه وکړه.
ده همدا راز د سیمه ییزې حکومتدارۍ د ټینګښت پروګرام څخه مننه وکړه،چې د دغه پلان د چاپ لګښت ترڅنګ یې د پلان طرحه او ډیزاین چارې هم ترسره کړې .
نوموړی د ټولو ادارو مسؤلینو ته لارښوونه وکړه،چې د پلان شویو پروژو د پلي کولو پر مهال له کیفیت څخه څارنه وکړي او هم مرستندویه ادارو څخه د بودیجې په ترلاسه کولو کې د پروژو د تطبیق هڅه وکړي .
هغه هیله څرګنده کړه،چې د ۱۳۹۴ کال په ترڅ کې به پلان شوي پروژې په ښه توګه د ولسونو په همکارۍ پخپل وخت پیل او پای ته ورسیږي .