لراوبر ویب پاڼه لراوبر يو افغان – تازه خبرونه
ولسمشر ته نژدې سرچینه وايي، کرنې وزارت ته کاندید یعقوب حیدري هم له کاندیداتورۍ تېر سوی دی.
له دې مخکې د ولسمشرۍ دفتر ویلي وه، چي د ښاغلي حیدري د قضیې په اړه یې څېړنه پیل کړې ده.
وروسته تر هغه چې د ښاغلي حیدري نوم د ملي یووالي حکومت د وړاندیز سوې کابینې په لست کې راغلی، د نړیوالو پولیسو (انټرپول) اعلان وکړ چې دوی ددغه سړي په لټه کې دي.
نړیوالو پولیسو ویلي، ښاغلی حیدري له مالیاتو تښتېدلی دی.
انټرپول وايي، ښاغلی حیدري په ۲۰۰۳ کال کې د استونیا له خوا لټول کېده، ځکه چې له مالیو څخه تښتېدلی و.
خو ښاغلي حیدري رسنیو ته وویل، نوم یې ځکه د انټرپول په لست کې دی، چې یوه بل تن دده شرکت اخیستی او د شرکت اړونده مالیه یې نه ده ورکړې.
ارګ ته نژدې سرچینه وايي، په پام کې ده چې د ښاغلي پوپل پرځای مالیې وزارت ته واشنګټن کې افغان سفیر اکلیل حکیمي وړاندې شي.