لراوبر ویب پاڼه لراوبر يو افغان – تازه خبرونه
نن سهار څه کم يوولس بجې د کندهار په عينو مېنه کي د يوه موټربم چاودنه وسوه .په لومړنيو مالوماتو کي د يوه کوچني د زخمي کېدو خبر ورکړه سوی دی، د پېښي په اړه تر دې دمه يوې خوا هم څه نه دي ويلي.
پېښه دوهمي فوارې ته نژدې رامنځته سوېده چي د شاوخوا سوداګريزو مرکزونو او کورونو کړکيو ته يې هم زيان رسولی دی.
عيني شاهدان وايي چي په سيمه کي يوه ولاړ کرولا ډوله خالي موټر ته چاودنه ورکړه سوه.
د يادوني وړ ده چي عينو مېنه د هيواد په کچه د پرمختلليو عصري ښارګوټو څخه شمېرل کېږي، په دغه ښارګوټي کي اوس هم د جوړوني پروژې رواني دي. د ښکلا او امنيت په سبب د ښار او شاوخوا سيمو ځوانان عينو مېني ته مېلو او تفرېح د پاره راځي.
تر دې وړاندي هم په عينو مېنه کي يوه چاودنه سوې وه خو تېره مياشت په يوه کور کي د په زيات شمېر د وسلو او مهماتو کشفېدلو د عينو مېني د امنيت په اړه پوښتني راپورته کړې.
د عينو مېني په ټولو دروازو کي امنيتي موظفين ولاړ وي او له ځينو کسانو د عينو مېني د کارت پوښتنه کوي خو د پاکو کاليو او نسبتآ نوو موټرو لرونکو کسانو څخه تلاښي نه اخستله کېږي که څه هم چي د دې ښارګوټي اوسيدونکي نه وي.