لراوبر ویب پاڼه لراوبر يو افغان – تازه خبرونه
په یوې بمي چاودنې او وسلواله نښته کې درې تنه مخالف وسلوال وژل شوي او یو تن قوماندان یې شدید زخمي شوی.
د الینګار ولسوالۍ اړوند د نیمنانیو په سیمه کې دوه تنه مخالف وسلوال چې یو یې نعمت الله او بل یې فضل غني نومیدل د خپل ماین په چاودنه کې وژل شوي. دغه کسان چې اصلا د یادې ولسوالۍ د کوټالۍ د سیمې اوسیدونکي ول په نیمنانیو سیمه کې یې ماین ځای پر ځای کولو چې د ماین د انفجار له امله دواړه وژل شوي دي.
دغه راز د الیشنګ مهترلام تر منځ په غځیدلې لاره د کرنجاوې په سیمه کې د پولیسو او مخالفو وسلوالو تر منځ په یوې وسلوالې نښتې کې د سمیع الله په نوم د مخالفینو یو قوماندان چې مشهور په شاهدالله و سخت ټپي شوی او د رحمت په نوم یو بل مخالف وسلوال وژل شوی دی. په دغه نښته کې پولیسو ته کومه مرګ ژوبله نه ده اوښتې.
بل لور د قرغیو ولسوالۍ په اروا سیمه کې د ملي اردو په یو هاموې باندې یو ځای پر ځای شوي ماین انفجار کړی چې له امله یې د ملي اردو دوه عسکر ئې وژلي او دوه تنه نور یې زخمیان شوي دي.
په دې اړه خپله وسله والو تر اوسه څه نه دي ويلي.