لراوبر ویب پاڼه لراوبر يو افغان – تازه خبرونه
سرنوشت ورځپاڼه: د لندن کنفرانس د پخوانیو ژمنو تکرار
کابل ورځپاڼو نن په خپلو ګڼو کې د نورو مطالب ترڅنګ د لندن د کنفرانس او په افغانستان کې د اضافي پاته کیدونکو امریکایي سرتیرو په اړه لیکنې کړي دي.
سرنوشت:-
سرنوشت ورځپاڼه “د لندن کنفرانس د پخوانیو ژمنو تکرار” تر سرلیک لاندې یو مطلب خپور کړی او په یوې برخه کې یې راغلي چې په دغه غونډه کې داسې کومه ژمنه و نه شوه چې له مخې یې افغانستان پر ځان بسیا شي یا سولې ته لاره هواره کړي.
په مطلب کې د همدې کنفرانس په اړه د کارپوهانو نظر راخیستل شوی چې وایي؛ نړیوال به بیا هم خپلې مرستې د شخصي انجیوګانو له لوري په بې اغیز ډول لګوي او په افغانستان کې تر امنیت وړاندې لویې پانګونې هم ناشونې بریښي.
ورځپاڼه زیاتوي، د شنونکو په باور د لندن غونډه یو تکراري بڼه لرله او ژمنې یې هم پخوانۍ او بنسټیزې نه وې.
ویسا:-
ویسا ورځپاڼې بیا په خپلې سرمقالې کې د افغانستان اوسنی وضعیت له دیارلس کاله مخکې سره پرتله کړی او لیکي چې آیا د لندن کنفرانس د دوه زره او لومړي کال په څیر له صفره د بیا پیل د تکرار ډرامه نه ده؟
د مقالې لیکونکی زیاتوي چې هغه مهال هم افغان چارواکو له نړیوالې ټولنې سره په ګډه ولس ته دا زیری ورکوی چې وطن ګل او ګزار شو.
خو د مطلب د لیکونکي په باور، اوس وینو چې لوبه د پخوا په پرتله نوره هم خطرناکه شوې ده او هیله څرګندوي چې خدای دې وکړي زموږ چارواکي د پخوا په څير په تشو وعدو تیر نه وځي او دې ته پام وکړي چې هیواد مو د پردۍ جګړې له لمبو نه څه ډول وتلای شي.
همدې ورځپاڼې بیا په لومړي مخ کې د واشنګټن پوسټ هغه راپور راخیستی چې وايي،
امریکا غواړي راتلونکی کال په افغانستان کې خپل سلګونه اضافي سرتیرې په موقتي ډول و ساتي.
په مطلب کې راغلي چې دا له هغو ۹۸۰۰ سرتیو جلا دي چې ولسمشر اوباما یې په افغانستان کې د پریښودلو اعلان کړی و.
ورځپاڼه د امریکایې چارواکو په حواله زیاتوي چې وايي؛ ښایي د ناټو نور غړي هیوادونه په افغانستان کې له ژمنې سره سم دولس زره سرتیري چمتو نشي کړای نو د همدې تشې د ډکیدو لپاره به خپل یو شمیر سرتیري په موقتي توګه په افغانستان کې وساتي.
محور:-
بله ورځپاڼه محور هم پر همدې موضوع لیکي چې، دا مهال د بارک او باما د ادارې او نورو متحدانو تر منځ په دې اړه بحثونه جریان لري چې، ناټو به له روان کال وروسته څه شمیر سرتیري په افغانستان کې پریږدي.