لراوبر ویب پاڼه لراوبر يو افغان – تازه خبرونه
د کابینې د نیم په نیمه ویش پر سر د ولسمشر او اجرایه رییس تر منځ جوړجاړی او د مشرانو جرګې له خوا د کابل واشنګتن د امنیتي تړون له تاید څخه د ولسمشر غني هرکلی هغه څه دي چې د کابل چاپ په نننۍ ورځپاڼو کې ورته ځای ورکړل شوی دی.
ویسا:
ویسا ورځپاڼې ولسمشر او اجرایه رییس ته د یوې نېږدې سرچینې له قوله لیکلي دي چې ولسمشر محمد اشرف غني او اجرایه رییس عبدالله عبدالله د کابینې د نیم په نیمه ویش پر سر جوړ جاړي ته رسیدلي دي.
د سرچینې په وینا، یو شمېر دغه کسان به د نوماندو وزیرانو په توګه د لندن په کنفرانس کې ګډون وکړي.
محور:
دغه شان د محور ورځپاڼې په لومړي مخ کې هم حکومت ته د یوې نېږې سرچینې له قوله لیکل شوی چې د لندن تر کنفرانس د مخه به د نوې کابینې یو شیر غړي اعلان شي.
د لیکوال په وینا، ولسمشر او اجرایه رییس ډواړه هڅه کوي چې د لندن تر کنفرانس د مخه د نوط کابینې یو شمېر غړي معرفي کړي.
په ورځپاڼه کې لیکل شوي چې د کابینې د اعلان په اړه د دواړو مشرانو لیدلوری سره نېږدې شوی دی.
انیس:
د انیس دولتي ورځپاڼې په لومړي مخ کې بیا لیکل شوي چې ولسمشر محمد اشرف غني د افغانستان د مشرانو جرګې له خوا د افغانستان او امریکا تر منځ د امنیتي تړون د تاید هرکلی کړی دی.
ورځپاڼې د جمهوري ریاست د مطبوعاتي دفتر له قوله لیکلي دي چې ولسمشر ویلي؛ د دغه تړون تاید به د افغان امنیتي ځواکونو د روزلو په برخه کې ګټور تمام شي.
ورځپاڼه وايي چې د دغه سند له مخې به افغان امنیتي ځواکونه د ټول هیواد امنیتي چارې سمبال کړي.
هېواد:
دغه شان د هیواد ورځپانې په لومړي مخ کې هم همدې موضوع ته پام شوی او د مشرانو جرګې له خوا یې د دغه سند د تاید په اړه د ولسمشر د هرکلي خبره کړې ده.
په ورخپاڼه کې راغلي چې د دغه سند په تاید سره به د افغان امنیتي ځواکونو د پیاوړي کولو او تجهیز په برخه کې مثبت ګامونه پورته شي.