لراوبر ویب پاڼه لراوبر يو افغان – تازه خبرونه
د طالبانو وياند قاري يوسف احمدي وايي د كندهار ښار ته څرمه د ارغنداو د ولسوالۍ ډېره برخه يې نيولې ده.
جيو نيوز د طالب وياند له خولې خبر وركړ، چي ولسوالي يې تېره شپه له افغان پوليسو سره تر جګړې وروسته نيولې ده.
د طالب وياند د څرګندونو په اړه لا افغان حكومت څه نه دي ويلي، خو د سيمي هغه اوسېدونكي چي نن سهار كندهار ته راغلي، په ارغنداو كي د زرونو طالبانو د شتون پخلى كوي.
د طالبانو وياند قاري يوسف احمدي وايي په ارغنداو كي يې اوس هم له دولتي ځواكونو سره جګړه روانه ده، د نوموړي په وينا په دې جګړه كي دوه طالبان او اووه پوليس مړه سوي دي.
د ارغنداو ولسوالي ته په تېر مني كي هم په سوونو طالبان راغلي وه، خو تر دوو ورځو وروسته يې بېله كومي جګړې سيمه خوشي كړې.
طالبان وايي د ارغنداو په نيولو كي د كندهار له محبس څخه تښتېدلو بنديانو هم برخه ورسره اخيستې ده.
ارغنداو چي د كندهار يوه له تر ټولو شنه او سمسوره ولسوالي ده، شك نسته چي كه جګړه پكښي وموښلي، پراخه ولسي مرګ ژوبله او مالي تاوانونه به ولري.