لراوبر ویب پاڼه لراوبر يو افغان – تازه خبرونه
ودان افغانستان ګوند د یوې پراخې غونډې په ترڅ کې، د ولسمشریزو ټاکنو له مخکښ نوماند ډاکټر اشرف څخه خپل ملاتړ اعلان کړ او ویې ویل چې پرته له کوم امتیاز څخه د تحول او تداوم له ټیم سره یو ځای شوي دي.
د ودان افغانستان ګوند سرپرست مشر محمدیار- یار په دې اړه په یاده ملاتړغونډه کې وویل چې د تحول او تداوم ټیم څخه ځکه خپل ملاتړ اعلانوي، چې د نوموړي ټیم منشور د ودان افغانستان ګوند له تګلارې او کړنلاري سره خورا زیات مشترک ټکي لري، ښاغلي محمدیار د نمونې په توګه د تحول او تداوم ټیم د اقتصادي برنامه یادونه کړه، چې د ودان افغانستان ګوند له اقتصادي تګلارې سره پوره سرخوري.
نوموړي زیاته کړه چې پرته له کوم امتیاز څخه د تحول او تداوم له ټیم سره یو ځای شوي دي او په راتلونکي کې به د نوموړي ټیم واک ته د رسېدو سره سم د هغوی له کړنو نظارت کوي او پر له پسې به کوښښ کوي، چې یاد ټیم دې ته مجبور کړي، چې هغه ژمنې، چې د کمپاین پر وخت يې ولس ته ور کړي دي، عملي کړي.
ور پسې د اقتصاد پخواني وزیر او د تحول او تداوم ټیم غړي ښاغلي انورالحق احدي خبري وکړې، اوخوښې یې څرګنده کړه، چې د ودان افغانستان ګوند د تحول او تداوم له ټیم څخه خپل ملاتړ اعلان وي.
ښاغلي احدي وویل چې افغانستان په ډېر بد اقتصادي حالت کې قرار لري، چې د همدا بد حالت څخه د را ایستلو یوازینۍ لاره د تحول او تداوم ټیم اقتصادي برنامه ده، چې په پلي کولو سره به یې د افغانستان اقتصاد پر خپلو پښو ودرېږي.
د غونډې درېیم وینا کوونکی د تحول او تداوم د ټیم دوهم مرستیال ښاغلی سروردانش و، ښاغلي دانش په دې خوښي وښوده، چې د افغاني ټولنې یو روشنفکره قشر( ودان افغانستان ګوند) له تحول او تداوم ټیم څخه خپل حمایت اعلانوي.
نوموړي له افغان ولس څخه وغوښتل، چې د جوزا پر ۲۴- مه را ووځي، رایه ورکړي او خپل سرنوشت په خپل وټاکلي.
ښاغلي دانش زیاته کړه چې د تحول او تداوم ټیم به واک ته د رسېدو په صورت کې د اداري فساد او بیکارۍ له منځه وړل، د قانون پلي کول او سوله راستلو ته لومړیتوب ورکړي.
د تحول او تداوم ټیم دوهم مرستال د ودان افغانستان ګوند څخه غوښتنه وکړه، چې د هېواد ګوټ- ګوټ، ته ولاړ شي او خلک رایه اچونې ته وهڅوي.
د ملاتړ غونډې په وروستیو شېبو کي د تحول او تداوم ټیم څخه د ودان افغانستان ګوند د ملاتړ اعلامیه ولوستل شوه.