لراوبر ویب پاڼه لراوبر يو افغان – تازه خبرونه
د افغانستان د قومونو د پیوستون ټولنې د هېواد جمهوررئیس حامدکرزي ته د هغه د غوره خدمتونو له امله ستاینلیک ورکړ.
په هغو مراسمو کې چې نن له غرمې مخکې په ارګ کې پرځای شول، د افغانستان د قومونو د پیوستون د ټولنې رئیس او مرستیال د دغي ټولنې د رهبرۍ پلاوي په استازیتوب خبرې وکړې او په تېره یوه لسیزه کې یې د جمهوررئیس حامدکرزي خدمتونو ته د اشارې په ترڅ کې وویل چې تاسو د افغانستان آبادي له صفر څخه پیل کړه او په تېره یوه لسیزه کې مو افغانستان له سختو شرایطو څخه د ثبات په لور رهبري کړ.
وینا والو جمهوررئیس کرزی مخاطب کړ، وې ویل: ستاسو د زعامت په دوران کې په افغانستان کې دیموکراسي کلکه شوه او دغه هېواد د سترو لاس ته راوړنو خاوند شو. تاسو د بې طرفۍ په اختیارولو او انتخاباتو ته د زمینې په برابرولو سره دغه ملي بهیر لا پیاوړی کړ او ملي ګټې مو پر خپلو ګټو او کورنۍ مقدمې وبللې.
دوی څرګنده کړه چې د افغانستان د قومونو د پیوستون ټولنه چې له ۱۷۰ بنسټونو، اجتماعي سازمانونو او مدني ټولنو څخه جوړه شوې ده، ستاسو د دغو نه هېریدونکو خدمتونو او په هېواد کې د ملت جوړونې په برخه کې د ملي وحدت لپاره ستاسې نه ستړې کېدونکې هڅې ستایي او د دغه ستاینلیک په وړاندې کولو سره تاسو عالیقدر ته د لا نورو بریاوو هیله کوي.
جمهوررئیس حامدکرزي د افغانستان د قومونو د پیوستون د ټولني له ستاینلیک څخه د مننې په ترڅ کې وویل: دا زما لپاره د ویاړ ځای دی چې د افغانستان د خلکولخوا ستایل کیږم.
د هېواد جمهوررئیس وویل، افغانستان یو ښکلی هېواد دی او د نړۍ په یوه ډیره حساسه سیمه کې موقعیت لري او د افغانستان ملت په اتحاد او اتفاق کې بې مثاله ملت دی.
جمهوررئیس کرزي په هېوادکې د انتخاباتو بهیر ته د اشارې په ترڅ کې وویل چې زموږ انتخابات ملي دي ځکه چې د جمهوري ریاست د دواړو مخکښو نوماندانو په انتخاباتي ټیمونوکې د هېواد د بېلابېلو سیموخلک شتون لري.
د هېواد جمهوررئیس زیاته کړه چې افغانستان د لا آبادۍ او پرمختګ په لور روان دی ځکه چې د هېواد اختیار د هغه د خلکو په لاس کې دي، کله چې اختیار د خلکو په لاس کې وي، خلک د ځان لپاره غلطه لاره نه انتخابوي.
جمهوررئیس کرزي وویل، موږ تکړه ملت لرو که قوي دولت هم ولرو نو ډیر ژر به مو لا نورې بریاوې هم په نصیب شي.