نيدرلند ته د ښاغلي حامد کرزي د رسمي سفر په اړه

د لوی څښتن په نامه

نيدرلند ته د ښاغلي حامد کرزي د رسمي سفر په اړه
په نيدرلند کې د افغاني کلتوري ټولنې د غبرګون په اړوند
د هالند- مېشتو افغانانو دريځ

په دغه اوونۍ کې د ښاغلي حامد کرزي د رسمي سفر په ترڅ کې د افغانستان د کونسلګري په ټينګار د دې هڅه وشوه چې د افغانانو په استازيتوب ځينې هغه افغانان چې په نيدرلند کې د افغانستان د کونسلګري لخوا مخکې له مخکې ټاکل شوي ول، له ښاغلي حامد کرزي سره په پټه وګوري او د يو شمېر نورو افغانانو د استازو مخنيوی وشو، چې له ښاغلي حامد کرزي سره ليدنه وکړي او په دې اړه په نيدرلند کې افغاني کلتوري ټولنې خپل غبرګون څرګند کړ او د ټوليزو رسنيو په مرسته يې خپور کړ.

په نيدرلند کې د افغاني کلتوري ټولنې د غبرګون په اړه په نيدرلند کې ګڼشمېر افغانانو په تليفوني اړيکو او د برېښناليکونو په مرسته د افغاني کلتوري ټولنې د دريځ هرکلی وکړ او په نيدرلند کې يې د افغانستان د کونسلګري د پورته ياد شوي چلند غندنه وکړه او د افغانستان کونسلګري په رسمي پاڼو او برېښنا پاڼې کې د افغانستان يوازې د فارسي ژبې شتوالی او د بلې رسمي پښتو ژبې د نه شتولي په اړه يې د سپيناوي غوښتنه وکړه.

په نيدرلند کې د افغاني کلتوري ټولنې د اداري کميسيون له پرېکړې سره سم د افغاني کلتوري ټولني پوهنيز کميسيون ته دنده وسپارل شوه، چې په نيدرلند کې د افغانستان د کونسلګري د فعاليتونو په اړه څېړنه تر سره کړي او بېلابېل اړخونه يې وپلټي، چې په دې اړه په نيدرلند کې مېشتو افغانانو ته د خپلې بېړنۍ څېړنې پايله واوروي او اړوندو لوړپوړو چارواکو ته يې واستوي.

د افغانستان کونسلګري په نيدرلند کې له څو کلونو راهيسې فعاله ده، چې په پيل کې يې په أمستردام کې په خپلو هڅو پيل وکړ او بيا په وروستيو مودو کې د Den Haag ښار ته کډه شوې ده. د افغانستان په کونسلګري کې يوازې فارسي ژبه رسمي او منل شوې اداري ژبه ده او په پښتو ژبه ليکل شوې پاڼې نه لري او پښتو ليکل شوې عريضې نه منل کېږي، چې ګڼشمېر هېوادپاله افغانان د ژبو په برخه کې د انډول د نه ساتلو په اړه خواشيني څرګنده کړې ده او د افغانستان له چارواکو يې په دې برخه کې د جوت ګام اخيستنې، غوښتنونکي دي . 

په نيدرلند کې افغاني کلتوري ټولنې د افغانستان د کونسلګري برېښناپاڼه وڅېړله. دغه پاڼه دري او انګرېزي برخې لري. کله چې تاسو دري کښېکاږی، نو د (ګذارش مختصر سفر جلالتمأب حامد کرزی رئيس ج.ا.ا. به هالند) تر نامه لاندې لنډ مالومت ورکړ شوی، چې په هغه کې په نيدرلند کې له ځينو افغانانو سره د ښاغلي حامد کرزي پټه ليدنه، نه ده ياده شوې.  د اخبار تر نامه لاندې د افغانستان د بهرنيو چارو د وزير لخوا، د ښاغلي کونسل نومونه د کيمياوي وسلوو د منع کولو په سازمان OPCW کې د همېشني استازيتوب په توګه مالومات ورکړ شوی، چی دا برخه د ښاغلي کونسل شخصيت ته ځانګړې شوې ده او دا په ګوته کېږي، چې دغه پاڼه د افغانستان لپاره نه بلکې د ښاغلي کونسل د شخصي تبليغانو لپاره کارول کېږي. د  رهنمود په کښېکاږلو بیا د کونسلګري د کارونو د توګو په اړه مالومات تر لاسه کېږي. د برېښناپاڼې انګرېزي برخه يې تشه ده او يوازې په يوه برخه کې، د کيمياوي وسلوو د منع کولو په سازمان OPCW کې د ښاغلي کونسل غړيتوب ته ځانګړې شوې ده. په زړه پورې خبره دا ده، چې د 2008 م کال د جون مياشتې په 12 نېټه يې د احمد شاه مسعود د مړينې د لمانځنې په اړه مالومات له برېښنا پاڼې څخه لېرې کړی دی، چې افغاني کلتوري ټولنه د دوی د دغه ګام ستاينه کوي. 

درنو هېوادوالو! د افغانستان د کونسلګري په پرتله په نيدرلند کې د افغاني بېلابېلو کلتوري ټولنو فعاليت ډېر پياوړی او ګټور دی، چې د بېلګې په توګه: د سلام فرهنګي ټولنې برېښناپاڼه او علمي سيمينارونه چې د افغانستان د موزيمونو په اړه يې د افغانستان د موزيم د مشر په ګډون د نيدرلند د لايدن په ښارکې جوړ کړی ؤ، يادولی شو. د افغانستان د کونسلګري په خپرونو اوفعاليتونو کې د افغانستان د تاريخي ارزښتونو په اړه هېڅ مالومات نه شته او د طلا تپې (زرغونډۍ) د تاريخي او ملي ارزښتونو سره نيدرلند ته د افغانستان د کلتور د وزير راتګ د کونسلګري په رسنيو کې نه دی منعکس شوی، چې په دې اړه د لراوبر برېښناپاڼې هلې ځلې د ستايلو وړ دي.

د افغانستان د کونسلګري ټولې رسمي پاڼې له لسو پاڼو نه اوړي او برېښناپاڼه يې له دريو پوره پاڼو نه ده زياته، چې په رسمي پاڼو کې مالومات يوازې په فارسي دی او په برېښناپاڼه کې د ديپلوماتيکو غوښتنو سره سم د افغانستان په اړه هېڅ ډول کلتوري، تاريخي او يا هم ټولنيز مالومات نه شته، نو دغه څېړنه دې ته ښودنه کوي، چې د افغانستان کونسلګري په څو کلونو کې د نيدرلند او افغانستان په نږدېوالو او د يو او بل کلتوري ارزښتونو په اړه د پام وړ کار نه دی کړی او په څو کلونو کې يې و نه شوای کولی چې د افغانستان په اړه يوه پراخبنسټه برېښناپاڼه سمبال کړي، چې د دغه کونسلګري نيمګړي کار ته ښودنه کوي، نو پوښتنه کېږي، چې له دوی به خلک په ديپلوماتيک ډګر کې د څه شي تمه کوي او ايا د دا ډول کاري ډلې لپاره کونسلګري په سفارت اړول له مسؤليت سره برابر کار دی!، چې د لګښت بار به يې د ځپيدلي افغان ولس پر اوږو وي.

په نيدرلند کې افغاني کلتوري ټولنه د افغانستان له کونسګري غواړي، چې په نيدرلند کې د افغانستان په کونسلګري کې ټولې رسمي پاڼې د فارسي ترڅنګ په پښتو هم شي، په برېښناپاڼه کې د پښتو برخه ورزياته شي او د ژبې انډول په خپرونو کې وساتل شي. افغاني کلتوري ټولنه به هڅه کوي چې په نيدرلند کې د افغانستان دکونسلګري فعاليتونه وڅاري او په راتلونکي کې به د پښتو په برخه کې د دوی دريځ په پام کې نيسي او د ټولنې غبرګون به څرګند کړي. 

په درنښت

په نيدرلند کې افغاني کلتوري ټولنه

د افغاني کلتوري ټولنې پوهنيز کميسيون

ډاکتر صبور عابد
ډاکټر سيد نصير
علي محمد مجبور