لراوبر ویب پاڼه لراوبر يو افغان – تازه خبرونه
اسلام اباد : دبي بي سي د خبر له مخې د پاکستان په پخواني پوځي مشر جنرال پرويز مشرف د اساسي قانون د ماتولو او د ۲۰۰۷ کال په نومبر کې د بېړني حالت د وضع کولو محاکمه په اسلام اباد کې پيل شوې ده.د پاکستان په اساسي قانون کې هغو کسانو ته د مرګ او عمري بند سزا ټاکل شوی، چې اساسي قانون مات کړي.د ښاغلي مشرف د محاکمې لپاره درې قاضيان ګومارل شوي او په هغه ځای کې چې د ده محاکمه کېږي شاوخوا يې سخت امنيتي تدابير نيول شوي دي.په دغو قاضيانو کې د سندهـ د عالي محکمې مشر قاضي فیصل عرب، د لاهور د عالي محکمې مشر قاضي ياور علي او د بلوچستان ايالت مشره قاضي طاهره صفدر شامل دي.پروېز مشرف چې تر دې مخکې يې محکمې ته يې له ورتلو ډډه کړې وه، څارنوالۍ يې پرته د ضمانت له منلو د نيولو امر ورکړ.په دې اړه د ښاغلي مشرف مدافع وکیل انور منصور خان محکمې ته وويل، چې موکل ته يې خطر و او له همدې امله محکمې ته حاضر نه شو.د ۲۰۰۷ کال د نومبر پر دريمه جنرال پرويز مشرف د پوځي ولسمشر په توګه اساسي قانون وځنډاوه او په هېواد کې يې بېړنی حالت وضع کړ.ښاغلي مشرف د نواز شريف واکمني چې موده يې لا بشپړه نه وه، د سپينې کودتا له لارې پای ته ورسوله او ځان يې د هېواد ولسمشر اعلان کړ.له دې وروسته يې د هېواد د قاضي القضات افتخار محمد چوهدري په ګډون د لوړې کچې شاوخوا ۶۰ عدلي چارواکي نظربند کړل.نواز شریف د مشرف د واکمنۍ په دوره کې په سعودي عربستان کې اوسېده او هغه مهال چې په ۲۰۰۸ کال کې له واکه لرې شوې، بېرته هېواد ته ستون شو.