له ژوندون تلوېزيون سره د توپيري او غير قانوي چلند په اړه

له ژوندون تلوېزيون سره د توپيري او غير قانوي چلند په اړه
د افغان ملي غورځنګ اعلاميه

د ډله ییزو رسنیو له لارې خبر شوو، چې د افغانستان لویې څارنوالۍ د اطلاعاتو او کلتور وزارت په غوښتنه په دې پلمه د ژوندون ټلوېزیون د خپرونو د ځنډولو امر کړی، چې ګواګې د افغانستان د وروڼو قومونو ترمنځ نفاق ته لمن وهي.
افغان ملي غورځنګ له یو شمېر رسنیو سره د لویې څارنوالۍ او اطلاعاتو او کلتور وزارت دا توپیري چلند په کلکه غندي او له حکومت څخه غوښتنه کوي چې پر ازادو رسنیو له هر راز فشار راوړلو څخه ډډه وکړي.
دا یو ښه ګام دی، چې حکومت د هغو رسنیو پر فعالیت بندیز ولګوي چې ملي نفاق او د قومونو ترمنځ بېلوالي ته لمن وهي، خو له بده مرغه دغه چاره له تېرې یوې لسیزې روانه ده او حکومت د هغو رسنيو مخه نه شي نیولی، چې د بهرنیو سرچینو په پټو مرستو تمويلېږي او په ښکاره ډول ملي نفاق ته لمن وهي.
موږ ولیدل او اوس هم د دې شاهدان یو چې په افغانستان کې یو شمېر رسنۍ د ملي او اسلامي ارزښتونو خلاف خپرونې کوي او حتا د افغانستان یوه ځانګړي قوم ته په څرګنده ښکنځلې او سپکې سپوري کوي، خو د اطلاعاتو او کلتور وزارت او لویه څارنوالۍ یې پر وړاندې چوپه خوله دي.
موږ له حکومت څخه غوښتنه کوو چې د رسنیو پر وړاندې له توپیري او سلیقوي چلند څخه په کلکه ډډه وکړي، د بیان ازادۍ ته درناوی وکړي او له هر ډول غرض پرته په بې پرې توګه د ټولو هغو رسنیو پر فعالیت بندیز ولګوي چې د افغانستان د ملي ګټو او ملي ارزښتونو خلاف خپرونې کوي.
د ژوندون ټلوېزیون د خپرونو د ځنډولو امر هېڅ قانوني توجیه نه لري او لویه څارنوالۍ باید خپله پرېکړه بېرته واخلي.
په درنښت
د افغان ملي غورځنګ مطبوعاتي څانګه