لراوبر ویب پاڼه لراوبر يو افغان – تازه خبرونه
راپورونه وايي د لوګر والي ارسلا جمال هغه مهال په یوه بم چاودنه کي وژل سوی، چي د لوګر ښار په مرکزي مسجد کي د اختر لمانځه ته راغلی وو.
لومړني راپورونه وايي پر ښاغلي جمال باندي د مسجد مایکروفون هغه وخت چاودلی، چي د اختر تر لمانځه دمخه يې په مسجد کي وینا کوله.
د ځينو نورو منابعو پر اساس چاودونکي توکي په مایکروفون کي نه بلکي د وينا ميز ته نژدې ځای پر ځای سوي وه.د لوګر چارواکي وايي په دې چاودنه کي تر شلو ډېر ټپیان دي، چي د اتو کسانو حالت مرګونی دئ.
ارسلا جمال د ولسمشر کرزي نیژدې ملاتړی وو، تر دې دمخه يې د خوست د والي په حیث دنده ترسره کړې او د ۲۰۰۹ کال په جمهوري ریاست انتخاباتو کي د ولسمشر کرزي کمپاینر وو.
د ښاغلي ارسلا جمال وژنه پر افغان چارواکو او د ولسمشرۍ راتلونکي دورې ته کاندیدانو سربېره ډېری ځوانانو غندلې او په خپلو فیسبوک پاڼو کي یې پر دې کړنه خواشیني څرګنده کړې ده.