لراوبر ویب پاڼه لراوبر يو افغان – تازه خبرونه
دپاکستان د طالبانو د پنجاب برخې مشر، عصمت الله معاویه له رسنیو سره په مرکه کې د پاکستان د لومړي وزیر، نوازشریف له خوا ددې ډلې د یوشمېر کسانو د اعدام سزا د بندلولو له پرېکړې دهرکلي او ستاینې ترڅنګ ویلي چې د پاکستان لومړي وزیر خپل ښه نیت ثابت کړ.نوموړي ویلي چې د پنجاپ طالبان به ډېر ژر د پاکستان له دولت سره د خبرو اترو په اړه خپله پرېکړه وکړي. ټاکل شوې وه چې د طالبانو څلور کسان د پاکستان پر پوځ په څو کاله وړاندې برید کې چې له امله یې څو پوځيان وژل شوي و، د لاس لرلو په تور اعدام کېدل.له دې وړاندې طالبانو ګواښ کړی و چې که چېرې دا کسان اعدام شي، طالبان به د پاکستان چارواکي او شخصیتونه په نښه کړي.دا په داسې حال کې ده چې د پاکستان لومړی وزیر، نوازشریف په دې وروستیو کې په دغه هېواد کې دوینې تویېدو او د ولسي خلکو د وژنې د ختمېدو په موخه له طالبانو سره د خبرو اترو غوښتونکی شو.هغه همدارنګه د پاکستان له ټولو سیاسي ډلو او ګوندونو وغوښتل چې ددغه هېواد د امنیتي او اقتصادي ستونزو د ختمولو په موخه د غوره لارې پيداکولو لپاره له دولت سره خبرې اترې وکړي.د پاکستان ددولتي او مخالفو ډلو ترمنځ له تېرې یوې لسیزې ډېر وخت راهیسې په زرګونو کسان وژل شوي دي.