لراوبر ویب پاڼه لراوبر يو افغان – تازه خبرونه
کندهار والي پر اوسنۍ دندي سربېره د افغانستان د زراعت پوهنتون رئيس وټاکل سو
کندهار والي د اولسمشر حامد کرزي په حکم، په دغه ولايت کي د افغانستان لپاره د جوړېدونکي زراعتي پوهنتون رئيس وټاکل سو.
کندهار والي به د جمهور رئيس د ((١٣٣٣)) ګڼې حکم سره سم، د ولايت د دندي سربېره د خپل کدري پوهاندۍ رتبې په حفظ، په عين وخت کي د کرهڼي د پوهنتون رهبري هم پر غاړه لري او د رغېدني ترڅنګ به يې په نورو ټولو برخو کي د زيربطه وزارتونو او مرسته کوونکو ډونرانو ((په خاصه توګه هند هيواد)) سره اړوند کارونه رهبري کوي.
هغه د کرهڼي په رشته کي دوکتورا لري او په دې برخه کي د خورا زياتي تجربې خاوند دى او په خپل اکاډيميک ژوند کي تر دې دمه مختلف کتابونه ليکلي او کلونه کلونه يې په دغه بخش کي د هيواد دننه او دباندي زرګونه محصلين روزلي دي.
ښاغلى ويسا د کابل پوهنتون د کرهڼي د پوهنځۍ څخه فارغ سوى او د ماسټرۍ او دوکتورا دورې يې د هيواد څخه بهر په بيروت، زوريخ او بريټيش کولمبيا پوهنتونونو کي بشپړي کړي دي.
هغه په ١٩٩١ ميلادي کال کي د کندهار پوهنتون بنسټ هم ايښى او دلته د پوهنتون تر رياست وروسته يې له افغانستانه دباندي هم په مختلفو پوهنتونونو کي د پروفيسرى دندي سرته رسولي دي.
دغه پوهنتون په ترنک فارم کي د هند هيواد په مالي مرسته باندي رغول کيږي چي پکښي به د ټول افغانستان د کرهڼي محصلين روزل کيږي او نوري څانګي به يې له پلان سره سم د هيواد په نورو برخو کي هم پرانستل سي.
کندهار والي همدا مهال هڅه کوي چي د مصر په نړيوال اسلامي کنفرانس کي د افغانستان لپاره منظور سوى اسلامي پوهنتون هم په کندهار کي ولايت کي جوړ سي او ددې سيمي طالب العلمان بهرنيو هيوادونو ته په اسلامي زدکړو پسې ولاړ نه سي.